16 Maýsym 2019, 12:31 816 0 Qoǵam Túrkistan Gazeti

Mindet! Abyroı! Erlik!

Qazaq áskeriniń elıtaly ókilderin daıyndaıtyn «Arystan» mamandandyrylǵan lıeıi kezekti túlekterin bitirip shyǵardy.

Saltanatty jıyn QR memlekettik Ánurany oryndalýynan keıin Lıeı basshysy pedagogıka ǵylymdarynyń doktory, zapastaǵy general-maıor Taýlanov Sábıt Sáýmenulynyń quttyqtaý sózimen ashyldy.

«Qurmetti túlekter, sender Qazaqstannyń bolashaǵysyńdar. Lıeıde alǵan bilim men tárbıe ómir boıyna azyq bolady dep oılaımyn. Búgin bitirip jatqan 80 balanyń árbiri el damýyna úles qosady dep oılaımyn. Endeshe, aq jol, joldaryń bolsyn», – dedi lıeı basshysy S.Taýlanov.

Lıeıdi bitirýshi túlekterge mamandandyrylǵan lıeı «Arystandy» bitirýleri týraly saltanatty túrde attestattar men arnaıy tós belgileri tapsyrylyp, bolashaq ómirlerine sát sapar aıtqan aq tilekter legi aǵyldy. Lıeıster altyn uıa – «Arystan» lıeıiniń Týymen qoshtasyp, bolashaq bitirýshilerge arnalǵan kapsýlany ornatty.

Saltanatty jıynǵa «Nursultan Nazarbaevtyń Bilim berý Qory» Qoǵamdyq qorynyń dırektorynyń orynbasary, professor Syzdykova Ǵaısha Nasyrovqyzy, Talǵar aýdanynyń ákimi R.A.Satbaev, QR Qarýly kúshteriniń ardagerleri men QR Qurlyq áskerı kúshteriniń basshylyǵynan polkovnık Rysbaı Ashat pen ata-analar komıtetiniń ókilderi men ózge de qonaqtar qatysty.

Bıyl «Arystan» lıeıiniń qurylǵanyna 8 jyl. Dıeı ujymy 7-ret túlekterin shyǵaryp saldy. Solardyń birazy AQSh, Belarýs, Qytaı, Reseı, Túrkııa, Ýkraınadan óz vıdeo quttyqtaýlaryn joldady. Endi bireýleri Lıeıin quttyqtaý úshin arnaıy kelip, jańa býynǵa sáttilik tiledi. Bir otbasydan birneshe ulannyń Lıeıde óz bilimderin jalǵastyrýynyń kórinisi retinde aǵaly-inili kýrsanttar men lıeısterge arnaıy sóz berildi.

Al «Arystannyń» búgingi tárbıelenýshileri qonaqtarǵa óz kezeginde zapastaǵy polkovnık V.V.Nebylıanyń basshylyǵymen qarýmen áskerı saptyq amaldaryn oryndap jáne zapastaǵy polkovnık A.T.Bekıshevtiń basshylyǵymen 3 túrli sport túrinen kórinistik jattyǵýlar qımylyn kórsetip, kórermenderdi rıza etti.

Horeograf muǵalim Iý.S.Lemeshkınanyń kórkemdik jetekshiligimen tamasha vals bıin tartý etti. Sonymen qatar lıeıdiń Qurmetti Qaraýyl vzvodynyń aıbyndy jigitteri karabınmen saptyq tásilderin oryndap, sheberlikterin kórsetti. Merekeniń jalǵasy «Arystan» mamandandyrylǵan lıeı oqýshylarynyń tolyq quramynyń saltanatty sherýine ulasty. Bul rásim ár lıeıstiń júregine maqtanysh sezimin uıalatady. Saltanatty sherýdi Lıeı týyn ustaýshy top bastady. Tý ustaýshy top quramy: zapastaǵy kapıtan Sadykov Asqar Serikboluly jáne oqý úlgerimi men sap daıyndyǵy boıynsha 11 – synyptyń úzdik lıeısteri – Serıkbaı Erketan, Esenov Habdýlla, Bahytjan Qajymuqan «Arystan» mamandandyrylǵan lıeıiniń Týyn ortaǵa alyp shyǵyp, kelesi oqý jylynyń úzdik lıeısterine tabystady.

Jıyn sońy lıeı oqýshylarynyń saltanatty áskerı sapta júrý sherýimen aıaqtaldy. Jıynǵa qatysqan qonaqtar lıeı basshysy zapastaǵy general-maıor,

pedagogıka ǵylymdarynyń doktory, professor, Sábıt Sáýmenuly Taýlanovqa, ustazdar ujymyna, lıeı qyzmetkerlerine, oqýshylaryna lıeıdiń bolashaqta budan bıik jetistikterge jetýine ystyq lebizderin bildirip, shynaıy qýanyshtarymen bólisti.

Bitirý keshi kesh qatysýshylary men qonaqtaryna saltanatty kóńil kúı syılady, lıeısterdiń jiger men shattyq, otanshyldyq rýhyn qonaqtarǵa darytty. Qonaqtar bolashaqqa degen senimderin shyńdap, «Arystan» atty áskerı baǵyttaǵy mamandandyrylǵan lıeı túlekterinen úlken úmit arqalap qaıtty. Sebebi ár memleket óziniń Qarýly Kúshterimen ǵana qaýip-qaterden qorǵana alady. Áskeri kúshti memleket jahandaný áleminde óz ornyn saqtaıdy. Al bizdiń arystandyqtar bizdiń kemel bolashaǵymyzdyń qaýipsizdigin qorǵaıtyn elıtalyq quram bolyp qalyptasady. Bizdiń lıeı Otan qorǵaýshylardyń sapaly tobyn qalyptastyrýǵa kúsh salýda. Qazaqstan Qarýly Kúshteriniń qataryn tolyqtyratyn bilimdi de, sanaly, patrıot bolashaq áskerı qyzmetkerlerge tek aq jol tileımiz! Kók baıraǵymyz kógimizde máńgi jelbiresin, Otan qorǵaýshy ulandar sany men sapasy jyl saıyn arta bersin! Alǵa «Arystan!».

Sońǵy jańalyqtar