14 Maýsym 2019, 16:29 731 0 Qaýipsizdik Dınara MYŃJASARQYZY

  Toqaev elde ótken mıtıngilerdiń sebebin aıtty

 Mıtıng kezinde qoǵamdyq qaýipsizdikke qaýip tóndirmegen adamdar jaqyn arada bosatylady. Bul týraly Qazaqstan Prezıdenti Qasym-Jomart Toqaev Euronews basylymyna bergen suhbatynda málimdedi, - dep habarlaıdy Tengrinews.kz tilshisi.

"Sherýge shyqqandarǵa kelsek, olar narazylyǵyn bildirý úshin kóshege shyqty. Qazir olardyń talabyn zertteý jumystary júrip jatyr. Kóbiniń talaby áleýmettik sıpatta. Mundaı máselelerdiń baryn joqqa shyǵarmaımyn. Negizinde mundaı jaǵdaı adamdardyń kedeılenýine baılanysty bolady. Olar úkimetten áleýmettik-ekonomıkalyq problemalardy sheshýdi talap etedi", - dedi Toqaev. Onyń aıtýynsha, quqyq qorǵaý organdary zańsyz akııalardyń jolyn kesýdi jalǵastyrady.  "Bas prokýratýra kóshedegi mundaı jıyndardyń zańsyz ekenin talaı aıtqan. Zańsyz mıtıngter, tártipsizdikter - buǵan qatysqysy kelmeıtin halyqqa kedergi keltiredi", - dedi Prezıdent. Munyń aldynda Aqparat jáne qoǵamdyq damý mınıstri Dáýren Abaev mıtıngige qatysqan halyqtyń eldiń taǵdyryna degen óz alańdaýshylyǵyn bildiretinin aıtqan edi.  "Búgin Bas prokýratýra ókilderi, Ishki ister mınıstrligi bul másele jaıynda pikir bildirdi. Men bul máseleniń basqa jaǵyna toqtalar edim. Biz saılaýdyń halyqtyń saıası belsendiligin aıqyndaıtyn kúsh ekenin túsinýimiz qajet. Halyq el prezıdentin tańdap, sonymen qatar eldiń bolashaǵyn da tańdaıdy. Osyǵan baılanysty olar saılaýdyń nátıjesine beı-jaı qaraı almaıdy. Sondyqtan saılaý nátıjesi jarııalanǵannan keıin, halyq ishte saqtap otyrǵan energııasyn syrtqa shyǵarǵysy keledi. Sodan keıin ol mıtıngige jáne túrli narazylyq bildirýge alyp keledi", - degen edi Abaev.

Sońǵy jańalyqtar