14 Maýsym 2019, 11:03 844 0 Qoǵam Túrkistan Gazeti

«Túrkistan tórinde» ótken syrlasý

13 maýsymda Túrkistandaǵy Qoja Ahmet Iasaýı atyndaǵy halyqaralyq qazaq-túrik ýnıversıtetiniń mádenıet ortalyǵynda «Túrkistan tórinde» syrlasý-suhbat keshi ótti. «Rýhanı jańǵyrý» baǵdarlamasy aıasynda qolǵa alynǵan «Túrkistan tórinde» jobasynyń alǵashqy kezdesýin Túrkistan oblysynyń ákimi Ómirzaq Shókeev ashyp berdi.

«Bul ıdeıanyń maqsaty – tanymal rýhanııat maıtalmandarymen Túrkistannyń mádenıeti,  tarıhy, jalpy qalyń qazaqtyń, túrki áleminiń  bolashaǵy  jóninde oı qozǵaý, aqyldasý. Ózderińiz biletindeı, memleket basshylyǵy tarapynan Túrkistan oblysyna, Túrkistan qalasyna aıryqsha qoldaý kórsetilip jatyr. Biz qurylys nysandaryn salýdy jáne ózge de jumystardy ýaqytynda atqara alamyz. Qalany da salamyz. Biraq sonymen birge mádenıetimiz ben rýhanııatymyzdy da soǵan saı etýimiz kerek. Mádenıet degen uǵym meniń túsinigimde mýzykamen, kınomen, ádebıetpen ǵana shektelmeıdi.  Mádenıet – adamnyń bolmysyna sińetin tereń uǵym. Úıde de, kóshede de, óndiriste de, jumysta da eń aldymen mádenıet joǵary bolýy tıis. Biz Túrkistandy túrki áleminiń mádenı-rýhanı ortalyǵyna aınaldyrýdy kózdegen bolsaq, osy ıgi iske Qazaqstandaǵy bar resýrstarymyzdy, ıntellektýaldy tulǵalardy jumyldyrýymyz kerek. Mine, «Túrkistan tórinde» jobasyn qolǵa alýdaǵy oıymyz da – osy» degen óńir basshysy suhbatqa aralasyp otyrdy. Dál búgin týǵan kúnin atap ótip otyrǵan tanymal aqyn – Nurlan Orazalındi quttyqtap, qurmet kórsetti.

«Túrkistan tórinde» jobasynyń alǵashqy qonaqtary – Memlekettik syılyqtyń laýreattary, kórnekti qalamgerler – Tólen Ábdik jáne Nurlan Orazalın, sondaı-aq tanymal jazýshy, kınodrammatýrg Smaǵul Elýbaı boldy. Júzdesýdi tanymal jazýshy «Alash» halyqaralyq syılyǵynyń ıegeri Marhabat Baıǵut júrgizip otyrdy.

Tólen Ábdik aldymen jurtshylyqty Túrkistan oblysynyń qurylǵanyna 1 jyl tolýymen quttyqtady. Túrkistannyń jańa mártebe ıe bolǵanyna erekshe qýanǵanyn, ulttyq sanany jańǵyrtýda bul qalanyń orny erekshe ekenin jetkizdi.

«Biz táýelsiz ult bolý proesin bastan ótkerýdemiz. Biraq bul máselede áli joǵary deńgeıge jete alǵan joqpyz. Keshegi keńestik sanadan da, rýlyq sanadan da tolyq aryldyq dep aıta almaımyz. Osy úderisterden ótip, úlken ultqa saı minez kórsetip, ǵylym men bilimdi damytýymyz kerek» dedi jazýshy.

Al aqyn, dramatýrg Nurlan Orazalın Túrkistannyń ádebıet pen ónerdiń ortalyǵyna aınalatynyna senim bildirip, qasıetti shahardy damytý, eldi birlikke shaqyrý týraly keleli oılar qozǵady.

Jazýshy, kınodramatýrg Smaǵul Elýbaı qoǵamdy alǵa jeteleý úshin ár adamnyń ımanyn kúsheıtý, din men ǵylymdy qatar damytý kerektigin aıtty.

Áserli júzdesýde Túrkistan oblysynyń shyǵarmashylyqqa qumar qaýymy úsh qalamgerge de, óńir basshysyna da suraqtaryn qoıyp, pikir almasty. Úzdik suraqtarymen kózge túsken oqyrmandarǵa úsh qalamgerdiń kitaptary syıǵa tartyldy.

Kezdesý sońynda oblys ákimi Ómirzaq Shókeev  úsh klassık qalamgerdiń ıyǵyna shapan jaýyp, qurmet kórsetti.

Aldaǵy ýaqytta «Túrkistan tórinde»  jobasy aı saıyn ótkizilip turady. Oǵan Qazaqstannyń jáne túrki áleminiń kórnekti aqyn-jazýshylary men qoǵam qaıratkerleri, sport jáne óner juldyzdary, kásipkerleri, aıtar oıy bar zııaly ókilderi qatysyp, jurtshylyqpen kezdesedi.

Telearnadan tolyq kórsetiletin joba arqyly Túrkistan óńiriniń rýhanı, mádenı, zııatkerlik deńgeıin kóterip, birlik pen yntymaqty, turaqtylyqty jan-jaqty nyǵaıtýǵa úles qosý kózdelgen.

Sońǵy jańalyqtar