13 Maýsym, 15:42 397 0 Nur Otan Turkystan Support

Jastar Prezıdent baǵdarlamasyn qoldaıdy

Memleket basshysy Qasym-Jomart Toqaevtyń saılaýaldy baǵdarlamasynda atalǵan mindetterdi júzege asyrý tetikterin talqylaý maqsatynda «Jas Otan» jastar qanaty respýblıkalyq jastar uıymdarynyń basshylary men jastar saıasatyndaǵy belsendiler bas qosty.

Basqosýǵa partııa kandıdatynyń nasıhat jumystaryn júrgizgen Respýblıkalyq qoǵamdyq shtab janynan qurylǵan TEAM QAZAQSTAN jastar tobynyń músheleri qatysyp, oı-pikirlerimen bólisti. Sharanyń shymyldyǵyn ashqan «Jas Otan» jastar qanatynyń tóraǵasy Dáýlet Káribek eń aldymen jastardy partııa kandıdaty Qasym-Jomart Toqaevtyń prezıdent saılaýyndaǵy jeńisimen quttyqtady. «Búgingi basqosý arqyly jastar memlekettik organdardan nusqaý kútpesten, óz bolashaǵyn qurýǵa belsendi aralasýǵa qabyletti ekenin kórsetkimiz keledi», – dep atap ótti tóraǵa.

Óz sózinde Dáýlet Káribek Qasym-Jomart Toqaevtyń 300 jasty iriktep, prezıdenttiń kadrlyq rezervin qurý týraly usynysynyń artyqshylyǵyna toqtaldy. Prezıdenttiń osy usynysynan keıin ártúrli jastar uıymdarynyń ókilderi habarlasyp, kadrlyq rezervke qalaı ótýge bolatynyn surap jatqanyn tilge tıek etti. Dáýlet Káribek kandıdattarǵa qandaı talaptar qoıylatyny áli bekitilmegenin, biraq bul baǵytta jastar atynan usynys jasaýǵa bolatynyn jetkizdi.

Bul máselege qatysty «Bolashaq» qaýymdastyǵynyń atqarýshy dırektory Laýra Demesinova kadrlyq rezervke «Bolashaq» baǵdarlamasymen shetelde bilim alyp kelgen jastardy tartýdyń mańyzdylyǵyn aıta kele, bul úshin jastar uǵymynyń aıasyn keńeıtip, 35 jasqa deıingi azamattardyń da baq synaýyna múmkindik jasaý qajet degen usynysyn jetkizdi. Laýra Demesinovanyń sózinshe, memleket qarjysyna halyqaralyq úzdik bilim men tájirıbe alyp kelgen jas maman memlekettiń damýyna úlken úles qosa alady.

Jıynǵa qatysýshylar arasynda jemqorlyq faktilerin qysqartý úshin kadrlyq rezervke ótýge úmittilerdi jemqorlyqqa qarsy synaqtan ótkizý kerek degen pikir aıtqandar da bar. Bul rette «Jas ǵalymdar» alıansynyń tóraıymy Ásııa Ermuhametova ǵylymdy qoldaýǵa bólinetin 3 mlrd teńgeniń ıgerilýi jaıynda sóz qozǵady. «Bıyl 23 qańtarda Elbasy Nursultan Nazarbaev Úkimetke jas ǵalymdardyń irgeli jáne qoldanbaly zertteýlerin granttyq qarjylandyrýdy jyl saıyn 3 mlrd teńgege ulǵaıtýdy tapsyrdy. Sonymen qatar Jastar jyly aıasynda jas ǵalymdardyń áleýetin arttyrý maqsatynda olarǵa jan-jaqty qoldaý kórsetiletini aıtyldy. Biraq bul málimdemeden beri jarty jyl ótti. Qazir konkýrstyq qujattamany daıyndaý boıynsha jumystar júrip jatyr. Bul baıqaýdyń jarııalanýyn asyǵa kútemiz», – dedi Ásııa Ermuhametova.

Jıyn sońynda belsendi azamattar jastardyń damýyna yqpal etetin jobalardy qolǵa alý qajettigin aıtyp, tarqasty.

Sońǵy jańalyqtar