11 Maýsym, 13:32 381 0 Ádebıet TURKYSTAN.KZ

"Júz jyldyq jylnama" oqyrmanǵa jol tartty

Nur-Sultan qalasyndaǵy Ulttyq akademııalyq kitaphanada «Egemen Qazaqstan» gazetiniń 100 jyldyq mereıtoıyna arnalǵan "Júz jyldyq jylnama" atty 5 tomdy jınaqtyń tusaýy kesildi.  

Tusaýkeser rásiminiń aldynda basylym tarıhy baıandalatyn derekti fılm kórsetildi.

1919-1976 jyldar aralyǵyn qamtıtyn 5 tomdyq jınaq ázirge 2000 danamen baspadan shyqty.

"1919 jyly "Ushqyn" degen atpen shyǵa bastaǵan basylym ár jyldary  túrli atpen shyqsa da,  tildiń, dinniń, jerdiń, emleniń máselesin, ult múddesin kóterdi. Sol tustaǵy zııalylardyń arasyndaǵy aıtys- tartys, asharshylyq, repressııa, soǵys pen tyń ıgerý sııaqty tarıhı oqıǵalardyń bári osy jınaqta qamtyldy. Qazaq tarıhynyń shejireshisine aınalǵan gazettiń betinde Smaǵul Sádýaqasov, Júsipbek Aımaýytov, Muhtar Áýezov, Beıimbet Maılın, Sáken Seıfýllın, Turar Rysqulov, Oraz Jandosov, Ǵabbas Toǵjanov, Ǵabıt Músirepov sııaqty arystardyń izi qaldy. Kóp adam ol tusta gazetti ortalyq komıtettiń organy bolǵan dep oılaıdy. Olaı bolmaǵanyna osy bes tomdyqty oqyp kóz jetkizýge bolady. Bul jınaq gazet oqyrmandaryna ǵana emes, jýrnalıstıka tarıhy men ádebıettiń ótkenin zerttep júrgen ǵalymdarǵa, kásibı tarıhshylarǵa da taptyrmas qural bolady dep oılaımyn", - deıdi "Egemen Qazaqstan" respýblıkalyq gazeti" AQ-nyń basqarma tóraǵasy Darhan Qydyráli.

Jıynda sóz alǵan fılologııa ǵylymdarynyń doktoy, professor Namazaly Omashev: "Sáken Seıfýlınniń kezindegi memlekettik til úshin baspasóz betinde qalaı kúres júrgenin, 1923 jyly ultqa qazaq ataýyn qaıtarý úshin kimderdiń basyn báıgege tikkenin kórýge bolady", - dedi.

Sharaǵa shaqyrylǵan ózge de mártebeli meımandar basylym ujymyna aqjarma tilekterin arnady.

 

 

Sońǵy jańalyqtar