6 Maýsym 2019, 16:18 708 0 Áleýmet Turkystan Support

Ataýly áleýmettik kómek alýdyń kedergileri anyqtaldy

Aqtóbede memlekettik qyzmetkerlerdiń jármeńkesi ótti. Onda ataýly áleýmettik kómek, «Baqytty otbasy» baǵdarlamasy men mektepterge elektrondy túrde qabyldaý túsindirildi.

Aqtóbe qalalyq jumyspen qamtý, bilim, jer qatynastary men qurylys bóliminiń mamandary turǵyndardyń suraǵyna jaýap berdi. Turǵyn úı qurylys jınaq bankiniń mamandary «Baqytty otbasy» baǵdarlamasyn túsindirdi. Kóbi ataýly kómek alýdyń joldaryn surady. Mamandar kómek alý úshin jumystan bas tartatyndar men jumystan shyǵýdy josparlaǵandar bolǵan.

«Ataýly áleýmettik kómek alýda eki problema jıi kezdesedi. Birinshiden, ata-ana ajyrasqan soń alıment óndirmeıdi. Al tabys esepteý kezinde alıment kiriske jatady. Analarymyz aldymen alıment alýy kerek, bolmasa sot sheshimimen keledi. Ekinshiden, tekserý kezinde komıssııa ótinish bergen otbasynyń zeınetkerlermen birge turatynyn anyqtaıdy. Al ortaq tabysta kórsetilmegen. Ataýly áleýmettik kómek taǵaıyndaý kezinde «jumystan shyǵyp ketsek, jalaqymyz azaısa kelesi aıda alamyz ba» dep suraıtyndar bar. Joq, biz olardy jumysqa ornalastyrýymyz kerek. Qoǵamdyq, áleýmettik jumystar men jastar tájirıbesi, qurylysta, jol salý kezinde 100-120 myń teńge jalaqymen eńbekke aralasý usynyldy. Biraq «bizge jumys emes, AÁK kerek» dep otyrǵandar bar», – dedi qalalyq jumyspen qamtý ortalyǵy dırektorynyń orynbasary Altynaı Mahanova. Mamandar kún saıyn 100-den astam adamǵa ataýly áleýmettik kómek týraly keńes alady.

Qabyldaýǵa kelgen Aıgúl Tileýjanova 4 balanyń anasy. Ol kúıeýi jumys istemeıtinin, sol úshin ajyrasatynyn, sot 6 aıǵa sozylatynyn aıtyp, kómek surady. «Meniń 4 balamdy 6 aı boıy qalaı asyraımyn? Sondyqtan kómek surap kelip otyrmyn. Kúıeýim jumys istegen emes, ómir boıy ózim eńbek etip kelemin. Bul joly ajyrasýdy qaladym. Qazir ózim bala kútimimen otyrmyn», – dedi qala turǵyny Aıgúl Tileýjanova. Ataýly áleýmettik kómek berý komıssııasy bul ótinishti jeke qarap, sheshim shyǵaratyn boldy.

 

«Túrkistan-aqparat»

Sońǵy jańalyqtar