6 Maýsym, 16:13 185 0 Rýhanııat Turkystan Support

Oraza aıt – qýanysh pen shattyqqa toly meıram

Kúlli musylman qaýymy kesheli beri Oraza aıt merekesin toılap, bir-birimen qaýyshyp máz. Bul kúni Allanyń razylyǵy úshin bir aı boıy aýyz bekitip, musylmandyqtyń bes paryzynyń biri sanalatyn Orazanyń sharttaryn oryndaǵan jandar aýzyn ashyp, Aıt namazynda bas qosady. Budan keıin týǵan-týystary men jaqyndaryna  aıttap, kelesi Orazaǵa tórt kózi túgel jetýin tileıdi.

«Aıt» sózi – «merekeleý», «hal surasý», «bir-birin qýantý», «qýanyshqa toptalý», «qarymta» degen maǵynalardy bildiredi. Alla Taǵala aıt saıyn adam balasyna ár túrli jaqsylyqtar beredi. Aıt meıramy aldymen aıt namazyn oqýmen bastalady. Súıikti Paıǵambarymyz Muhammed (s.ǵ.s.) óz ósıetinde: «Aıt kúni birinshi oryndaıtynymyz – namaz oqý» degen. Bul namaz Islamnyń urany bolǵandyqtan, paıǵambarymyz Muhammed (s.ǵ.s.) ómirinde ony bir ret te qaldyrmaı oqyǵan. Aıtta musylmandardyń bir-birimen tatýlyqtaryn arttyrýy – merekeniń negizgi sáni. Bul meıramnyń ereksheligi –  adamdardy baýyrmaldylyqqa, kishipeıildilikke, keshirimdilikke, súıispenshilikke shaqyrady.

Oraza aıt merekesimen quttyqtaǵan Memleket basshysy Qasym-Jomart Toqaev: «Adamgershilikke, meıirim men qaıyrymdylyqqa úndeıtin qasıetti Ramazan aıynyń aıaqtalýy – kúlli musylman úmbeti úshin mańyzdy mereke.  Oraza aıt kúnderi ár musylman týǵan-týystary men baýyrlaryna qamqorlyq kórsetip, muqtaj jandarǵa qol ushyn sozyp, óziniń rýhanı damýyna zor mán beredi. Izgi oılar men ıgi ister ózara túsinistik pen kelisimge bastaıdy, adamdardy ortaq maqsat-múddege jeteleıdi.    Qazaqstan – beıbit ómir men jasampazdyqtyń mekeni. Ózge dinı senimderge qurmet, toleranttylyq pen adamgershilik qundylyqtar – halqymyzǵa tán ıgi qasıetter.   Islam ilimi Otanǵa degen súıispenshilik pen ulttyq dástúrge berik qoǵamymyzdyń rýhanı jańǵyrý ıdeıasyna tolyq saı keledi.   Elimiz aman, jurtymyz tynysh bolsyn!   Ár shańyraqqa baq-bereke tileımin! Oraza aıt qutty bolsyn!» degen ıgi tilegin jetkizdi.

Aıttyń alǵashqy kúni «Nur Astana» meshiti men «Astana» medrese kolledjine barǵan Qazaqstan Prezıdenti Q.Toqaev mundaı oqý ornynda oqıtyn shákirtter yntaly ári tárbıeli bolýy kerektigin atap ótti.

Al Qazaqstan musylmandary dinı basqarmasynyń tóraǵasy, Bas múftı Serikbaı qajy Oraz óz quttyqtaýynda: «Ár otbasyna baq pen bereke, birlik pen ıgilik tileımin. Alla Taǵala otyz kún tutqan orazamyzdy, jasaǵan qulshylyq-ǵıbadatymyzdy, bergen sadaqamyzdy, barsha ıgi ımanymyzdy qabyl etip, mol saýaptan jazǵaı! Oraza aıt – otbasylyq mereke. Meıram kúni ata-anamyzǵa, kishkentaı búldirshinderge, aǵaıyn-týystarǵa syılyq úlestirip, olardy qýanyshqa bóleý – merekeniń sánin arttyra túsetin ıgi is. Jabyrqaǵan jandy demep, qarııalardy qýanyshqa bólep, kómekke muqtaj adamnyń alǵysy men batasyn alý – ol da saýapty amaldyń biri», – dedi.

 

«Túrkistan-aqparat»

Tgter Ramazan aıt

Sońǵy jańalyqtar