4 Maýsym, 12:49 442 0 Jańalyqtar TURKYSTAN.KZ

Ákim baspanaly bolǵan analarǵa bazarlyq alyp bardy

Elimizde kóp balaly otbasylarǵa jaǵdaı jasaý – memlekettiń basty nazarynda. Aqtóbede turǵyn úı qurylysyn júzege asyrý jumystary aıasynda turǵyndardyń sanattylyǵyna saı baspanamen qamtý sharalary júıelengen. Bolashaqta satyp alý quqyǵymen jaldamaly páterge ıe bolý maqsatynda 90 páter berý kózdelse, qazirgi kúni onyń 25-i óz ıelerin tapty, qalǵandaryna kelisim-shart jasalý ústinde.

Baspana baqytyna ıe bolǵandardyń qatarynda aqtóbelik kóp balaly ana Zámzágúl Jýlamanova da bar. Jergilikti atqarýshy organnyń qoǵamdyq qabyldaýynda bolǵan ol qala ákimdiginiń qoldaýymen «Qolǵanat» qoǵamdyq qory arqyly «Turǵyn úı qurylys jınaq banki» AQ-na salymshy retinde alǵashqy jarna – 350 myń teńge tóledi. 6 aı merzimde páter qunynyń on paıyzyn jınap, endi «Baqytty otbasy» memlekettik baǵdarlamasy arqyly 2 paıyzben páter aqysyn óteıtin bolady. Eki bólmeli páterdiń quny – 7 mln. 200 myń teńge.

Qýanyshqa kenelgen kóp balaly otbasyn Aqtóbe qalasynyń ákimi Ilııas Ispanovtyń ózi quttyqtap bardy. Úı ıesi qala basshysyna, «Qolǵanat» qoǵamdyq qoryna rızashylyǵyn bildirdi.

Úsh balaly jalǵyz basty ana Samal Serikbaeva da jańadan alǵan baspanasynda endi ismerlikpen aınalysyp, tabys tabýdy kózdeıdi. Al, 46 sharshy metrlik bir bólmeli páterge ıe bolǵan múmkindigi shekteýli Álııa Saǵyndyqova jaldamaly páter úshin qyryq myń tólep kelgendigin, endi sol qarajatty óziniń baspanasyna tóleýge múmkindik bergeni úshin Aqtóbe ákimine alǵysyn jaýdyrdy.

I.Ispanov quttyqtap barǵan jańa páter ıesi – Araılym Mamekova – asyraýshysy joq kóp balaly ana. Jalpy quny 5 mln. teńge turatyn páterge endi aı saıyn otyz myńnan tóleıtin bolady.

Qonys toıyn toılaǵan úı ıelerine qala basshysy jemis pen tátti toly sebetter syılap, balalarynyń tól merekesimen, týǵan kúnderimen quttyqtady.

«Áreket etkenge bereket keledi» degen babalarymyz. Kerekti qujatyn jınap, tıisti mekemege tapsyrǵan jaýapkershiligi mol adamdy memleket te árkez qoldaýǵa daıyn. Osyndaı qýanyshqa keneletinderdiń qatary jyl sońyna deıin eselene túsedi. Óıtkeni, el turǵyndaryn, muqtaj azamattardy

baspanamen qamtý sharalary qarqyndy júrgizilýde. Muny memlekettiń qamqorlyǵy dep bilgenimiz jón», - dedi I.Ispanov.

Ashat RAIQUL

Sońǵy jańalyqtar