3 Maýsym, 19:16 447 0 Qoǵam Dınara MYŃJASARQYZY

Atyraý oblysynda 2 myńnan astam qoı qyrylǵan

Jergilikti jáne astanalyq mal dárigerleri qoılardyń jappaı qyrylýynyń sebebin naqty aıta almady. Atyraý oblysynyń Súıindik aýylynda bir aıdan beri belgisiz aýrýdan eki myńnan astam qoı qyrylyp qaldy. Sharýashylyqta Edilbaı qoıy ósiriledi.

Shyǵyn mólsheri 60 mıllıon teńgeden asqan. Júz adam jumys isteıtin asyltuqymdy sharýashylyq jetekshileri bul sharýashylyqtyń bir jyldyq tabysy ekenin aıtady.

Mamandar qoı sheshek aýrýynyń kesirinen qyrylyp jatyr degen dıagnoz qoıǵan. Tez arada 36 myń vakına alynyp, ekpe jasalynǵan eken.

"Bastapqy kezde naqty dıagnozy tabylmaǵanymen, maldy aman alyp qalý úshin otarǵa túgeldeı ekpe jasaldy. Barlyq sharany qoldansaq ta, shyǵyn áli de toqtamaı tur", - dedi mal dárigeri Halıyq Seıitjanov.

Synamalar Atyraý men astanadaǵy zerthanaǵa jiberildi. Aýyl sharýashylyǵy mınıstrliginiń jaýaby kóp kúttirgen joq. Alaıda másele munymen sheshilmedi. Sheshek aýrýy dıagnozy rastalmaǵan. Biraq maldyń qyrylýynyń naqty sebebi anyqtalmapty.

"Bizdiń maldyń dıagnozy áli kúnge deıin anyqtalmaı otyr. Quzyrly organdar osyny habarlap, múmkindiginshe bizge dotaııa, bolmasa ótemaqy tólep kómek etse degen oıym bar", - dedi sharýa qojalyǵynyń basshysy Baýyrjan Isaqulov.

Ózge sharýa qojalyqtarynda da qoıdyń qyrylyp jatqany belgili boldy. Jergilikti turǵyndardyń qoralaryndaǵy mal da belgisiz indetke shaldyqqan.

Sońǵy jańalyqtar