30 Mamyr, 11:05 487 0 Bilgenge marjan "Túrkistan" gazetiniń avtorlary

Kókpar tartyp, teńge ilip, jamby atqan

Elimizdiń túkpir-túkpirindegi sáıgúlikke jany qumar jandar bir apta boıy Taraz shaharynyń irgesindegi Bektóbede oryn tepken atshabarǵa aǵyldy. Olar at ústinde arbasqan alyptardyń beldesýin, taqymdaǵy serkeni jula tartqan kókparshylardyń tartysty oıynyn, quralaıdy kózge atqan mergenderdiń jamby atý jarysyn, teńge ilýde eptilik tanytqan jampozdardyń jankeshtiligin kózderimen kórip, qıqýlap otyrdy. Sporttyń tórt túrinen ótken el birinshiliginde 15 óńirdiń quramalary baq synady.

Aýdaryspaqtan ótken jarysta 5 salmaq dárejesi boıynsha 60 balýan synǵa tústi. 80 kılogramm salmaq dárejesinde jarysqa qatysqan som bilekti jambyldyq saıypqyran Nurjigit Ámzeev óziniń naǵyz babynda ekenin kórsetip altynnan alqa taqsa, alyptar básekesinde dodaǵa aralasqan Danııar Smaıylov ekinshi oryndy qanaǵat tutty. 60 kılogramm salmaq dárejesinde Túrkistan oblysynan kelgen Ermek Quralbaı qarsylas shydatpasa, 70 kılogramm salmaqta aqtóbelik Shyńǵyshan Erjanov jeńistiń eń bıik tuǵyrynan kórindi. 90 kılogramm salmaq dárejesinde Shyǵys Qazaqstan oblysynyń úmiti Mansur Tamıkenov top jardy, al +90 kılogramm salmaq dárejesinde Túrkistan oblysynan kelgen Birjan Qosalıev jeńimpaz atandy.

Teńge ilýden jarysqa elimizdiń ár qıyrynan kelgen 20 sportshy qatysyp, júldeli oryndardy sarapqa saldy. Nátıjesinde Túrkistan oblysynyń myqtysy Rahat Qambarov 4 upaı ıelenip birinshi orynǵa taban tirese, upaıy teń bolsa da, jyldamdyq jaǵynan alda bolǵan túrkistandyq taǵy bir qatysýshy Nurbaǵlan Sádýaqas kúmis júldege, jambyldyq Aıdyn Áshimjan úshinshi orynǵa laıyq dep tanyldy.

Jamby atýdan ótken doda da tartysqa toly boldy. Munda 22 sportshy synǵa túsip, jyldamdyqpen qatar mergendikterin kórsetti. Quralaıdy kózge atqan mergender alamanynda 29 upaıǵa qol jetkizgen qyzylordalyq Ǵalymjan Ómirtaı jeńimpaz atansa, áýlıeatalyq Abzal Tulybekov kezekti márte kúmis júldeni moınyna ildi. Qola medal túrkistandyq Eralhan Aıkózdiń enshisinde ketti.

Jamby atý dodasynda úsh birdeı arýymyzdyń baq synaǵanyn aıta ketken lázim. Árıne, olar júldege ilikken joq. Alaıda tájirıbesin tolystyra jatsa, bolashaqta úzdikter qatarynan kórinetin múmkindikteri bar ekeni anyq.

Kókpar dese kez kelgen qazaqtyń qany qyzyp, delebesi qozatyny jasyryn emes. Buǵan deıin ótken 18 chempıonatta 9 márte top jarǵan «Áýlıeata» kókparshylar komandasy qatarynan oza shaýyp, osy joly onynshy ret chempıon atanady degen jankúıerler senimi aqtaldy.

Jarys qorytyndysy boıynsha top jarǵan komandaǵa 1 mıllıon teńgeniń sertıfıkaty tapsyrylsa, ekinshi oryn alǵan «Qulager» komandasyna 700 myńnyń, úshinshi oryn ıelengen «Naryn» komandasyna 400 myńnyń sertıfıkaty berildi.

Eresekter arasyndaǵy el chempıonatyn elimizdiń Ulttyq sport qaýymdastyǵy, Mádenıet jáne sport mınıstrligi jáne Jambyl oblysy ákimdigi birlese júzege asyrdy.

 

Ashat RAIQUL

Sońǵy jańalyqtar