20 Mamyr 2019, 12:40 942 0 Zań Dınara MYŃJASARQYZY

Kópbalaly otbasylarǵa – 500 myń teńge

Túrkistan oblysynda óz kásibin ashqan kópbalaly otbasylarǵa qaıtarymsyz 500 myń teńge grant beriledi. Elbasynyń jańa bastamalaryna sáıkes, oblysta arnaıy shtab qurylyp, árbir otbasyǵa úıme-úı aralaý arqyly áleýmettik karta jasalyndy. Áleýmettik karta boıynsha oblystaǵy 86,6 myń kópbalaly otbasynyń 19 myńy turmysy tómender qataryna engizildi. Bul týraly Óńirlik kommýnıkaııalar qyzmetinde ótken brıfıngte oblys ákiminiń orynbasary Erbol Sadyr málimdedi, dep jazdy otyrar.kz.

«Búgingi tańda 24 748 otbasyǵa ataýly áleýmettik kómek taǵaıyndalyp, 21 608 otbasyǵa 4,7 mıllıard teńge tólendi. Sonymen qatar, 1 toqsanda kómek mólsheri qaıta qaralyp, 15 422 otbasyǵa kóbeıgen mólsherde ataýly áleýmettik kómek tólendi», — dedi Erbol Ábilhaıyruly.

Osy jyly engen ózgeristerge baılanysty shartty aqshalaı kómekti 12 aıǵa, shartsyz aqshalaı kómekti 6 aıǵa taǵaıyndaý kózdelip otyr. Bir otbasyǵa ataýly áleýmettik kómektiń aılyq mólsheri orta eseppen 100-150 myń teńgeni, jyldyq mólsheri 1,8 – 2 mıllıon teńgeni quraıdy. Osy qomaqty qarjyny tıimdi paıdalaný úshin turmysy tómen azamattardy kásipkerlikke tartý jumystary júrgizilip jatyr.

«Nátıjesinde 2019 jyldyń 1 toqsanynda 400-ge jýyq otbasy óz isin ashty. «Atameken» Ulttyq kásipkerler palatasymen birlesip «Eńbek» memlekettik baǵdarlamasyna tıisti ózgerister engizilgennen keıin kópbalaly otbasylarǵa qosymsha qaıtarymsyz 500 myń teńge memlekettik grant beriledi», — dedi oblys ákiminiń orynbasary.

Búgingi tańda oblysta kópbalaly otbasylarǵa «Yrys» mıkroqarjy uıymy arqyly bir paıyzdyq 2 mıllıon teńgege deıingi jeńildetilgen shaǵyn kredıt berilip jatyr. Osy maqsatqa 100 mıllıon teńge qarjy bólindi.

Budan bólek 2019 jyly respýblıkalyq bıýdjet esebinen 1248 otbasyny turǵyn úımen qamtamasyz etý josparlanǵan. Kópbalaly otbasylardy turǵyn úımen qamtamasyz etý jumystary demeýshiler esebinen de júrgizilýde. Bıyl demeýshiler tarapynan 18 kópbalaly otbasy baspanaly boldy.

Sońǵy jańalyqtar