17 Mamyr 2019, 12:19 579 0 Óner Túrkistan Gazeti

«Sońǵy muǵalim» júldege ilikti

Qazaqstanda kıno óneri qarqyndy damyp keledi. Jýyrda ǵana Álen Rahmetalıev túsirgen «Sońǵy muǵalim» qysqametrajdy fılmi Erevanda ótken halyqaralyq qysqametrajdy fılmderge arnalǵan festıvalde arnaıy júldege ıe boldy.

Kınotýyndyny QR Mádenıet jáne sport mınıstrligi tapsyrysy boıynsha Sh.Aımanov atyndaǵy «Qazaqfılm» kınostýdııasy túsirgen.

Fılmde hımııa pániniń muǵalimi Erjan Qaıdarulynyń ómiri baıandalady. Onyń sabaqtarynda oqýshylar únemi shýlap otyrady. Bir kúni joǵarǵy synyp oqýshylarynan jábir kórgen ulyn qorǵamaq bolǵan ustaz olarmen kúrespek bolady.

«Fılmniń osyndaı jetistikteri árıne qýantady. Men bul festıvalge bara almadym. Alaıda osy baıqaýǵa meniń kýrstasym, dosym Darhan Tólegenov qatysty. Onyń «Anna» atty fılmi de negizgi baǵdarlamada kórsetilgen bolatyn. Darhannyń aıtýyna qaraǵanda, otandyq fılmder  kórermender men festıval qonaqtarynyń kóńilderinen shyqty. Bul qazaq kıno óneriniń damýynyń birden bir aıǵaǵy, - dedi rejısser Álen Rahmetalıev.

Yerevan International Short Film Festival festıvali dostyq jáne jahandyq yntymaqtastyqty damytýdy kózdeıdi. Sondaı-aq festıvaldiń basty maqsaty - álemniń úzdik qysqametrajdy fılmderin kórsetýge bolatyn arnaıy alań ashyp, Armenııanyń kıno óndirisin damytý.

Bıyl festıvalge qatysýǵa 65 memleketten 650 ótinimder kelip túsken eken. Aıta ketsek, festıvaldiń dırektory atynan berilgen bul arnaıy júlde otandyq jas rejısser túsirgen Darhan Tólegenovtyń «Anna» atty fılmine de buıyrdy.

 

Sońǵy jańalyqtar