16 Mamyr, 14:49 400 0 Áleýmet Ásel ÁNÝARBEK

 «Nurly jer» – nátıjeli bastama

Bıyl elimizde 13 mln sharshy metr turǵyn úı salynbaq. Demek, qazaqstandyqtardyń baspanaly bolý múmkindigi artady. Bul týraly apta basynda «Nur Otan» partııasynyń ortalyq apparaty májilisinde «Nurly jer» baǵdarlamasynyń júzege asyrylýy boıynsha esep bergen Indýstrııa jáne ınfraqurylymdyq damý mınıstri Roman Sklıar málimdedi.

Mınıstr esep berý barysynda halyqty baspanamen qamtamasyz etýdegi oń kórsetkishterge toqtaldy. Mysaly, Qazaqstan jan basyna shaqqanda turǵyn úıdi paıdalanýǵa berý boıynsha TMD elderi arasynda alǵashqy orynǵa ıe. Mınıstr keltirgen derekterge súıensek, bul kórsetkish Qazaqstanda 0,68 sharshy metrdi qurasa, Reseıde 0,54 sharshy metrge teń. Al Belarýste – 0,40, Ózbekstanda – 0,36 sharshy metr. «Byltyr 12,5 mln  sharshy metr úı salyndy. 113 myń otbasy baspanaly boldy. Osynyń  nátıjesinde paıdalanýǵa berilgen turǵyn úı sany boıynsha Qazaqstan TMD  aýmaǵynda birinshi orynǵa shyqty. Qazir bizde bir adamǵa shaqqanda baspanamen qamtý – ortasha eseppen 24 sharshy metr. Bizdiń aldymyzda bul kórsetkishti 30 sharshy metrge jetkizý mindeti tur», – dep atap ótti mınıstr Roman Sklıar.

«Nurly jer» baǵdarlamasynyń jumysy munymen toqtamaq emes. Jıynda belgili bolǵandaı, qazirgi ýaqytta elimizde baspanaǵa muqtaj 31 myńǵa jýyq kópbalaly otbasy bar. Mınıstr aldaǵy 7 jyl ishinde osy sanattaǵy turǵyndardyń máselesi túbegeıli sheshimin tabatynyna sendirdi. Osy maqsatta «Nurly jer» baǵdarlamasy boıynsha 40 myńǵa jýyq páterdiń qurylysy bastalmaq. Sondaı-aq, bıyl Jastar jylyna oraı Nur-Sultan, Almaty jáne Shymkent qalalarynda bir myń turǵyn úı qoldanysqa berilmek.

Roman Sklıardyń esebinshe, búginde Almaty, Mańǵystaý oblystarynda qurylys qarqyndy júrgizilýde. Qazaqstan boıynsha paıdalanýǵa berilgen turǵyn úıdiń 45 paıyzy osy óńirlerge tıesili. Al eń tómengi kórsetkish Soltústik Qazaqstan, Pavlodar jáne Qostanaı oblystarynda tirkelip otyr.

 

Ásel MAQSATQYZY

Tgter Nurly jer

Sońǵy jańalyqtar