15 Mamyr 2019, 16:31 435 0 Aımaq "Túrkistan" gazetiniń avtorlary

Sportshy Qaraǵandyda akrobatıkany damytqysy keledi

Qaraǵandylyq sportshy Nıkıta Amoskın aımaqta sporttyq akrobatıkany damytýdy kózdep otyr. Álemniń birneshe dúrkin chempıony  jas sportshylarǵa tálimger bolý úshin qazir joǵary oqý ornynda bilimin shyńdaýda. Sonymen qatar Nıkıta – «Qazaqstannyń 100 jańa esimi» jobasyna ilingen jastardyń biri.

N.Amoskın Qaraǵandy qalasynda ótetin jattyǵýlaryna kúndelikti Novodolınsk eldi mekeninen keledi. Sportshy aptasyna alty ret 3-4 saǵattan jattyǵady. 19 jasar Nıkıta Amoskın men 16 jastaǵy Anastasııa Dolganıýk jastar arasynda akrobatıkadan ótken álem chempıonatynda altyn medalǵa ıe boldy.

«Álemdik jarystarda chempıon bolý ońaı emes, qasyńdaǵy seriktesiń de senimdi bolýy tıis», deıdi jas sportshy. Sol sebepti sporttyq juptyń jasy, salmaǵy men boıy úılesimdi, belgilengen talaptarǵa saı bolǵany abzal. Sondaı-aq  seriktesterdiń ózara psıhologııalyq úılesimdiligi de mańyzdy.

«Biz Anastasııa Dolganıýkpen 8 jyl jup bolyp óner kórsetip kelemiz. Bul ýaqyt ishinde birneshe ret Qazaqstan, eki márte Azııa chempony atandyq. 2018 jyly sporttyq akrobatıkadan álem chempıony ataǵyna ıe boldyq. Árıne, aramyzda túsinispeýshilik te bolyp turady, jattyǵýlar kezinde daýlasyp ta jatamyz. Degenmen, seriktes bolǵannan keıin til tabysyp kelemiz», deıdi «Qazaqstannyń 100 jańa esimi» jobasynyń qatysýshysy Nıkıta Amoskın.

Bastapqyda Nıkıta atasynyń jolyn qýyp, grek-rım kúresine bet burǵan eken. Al akrobatıkaǵa tek 9 jasynda kelgen. Búgin onyń qorjynynda 70 medal bar.

Jattyqtyrýshysy Botakóz Baıbaqushevanyń aıtýynsha, Nıkıta kelgen boıda daıyndyq tobynda júrgen. Óziniń ustamdylyǵy jáne birbetkeıligimen birden kózge túsipti.

«Tynymsyz eńbek etip, az ýaqyttyń ishinde jaqsy jetistikterge qol jetkizdi. Onyń bolashaǵynan zor úmit kútemiz, sportta baǵyndyrar bıigi áli alda. Nıkıta – otbasyndaǵy eki balanyń kenjesi. Qazir Qaraǵandy memlekettik ýnıversıtetiniń dene shynyqtyrý fakýltetinde oqıdy. Onyń endigi armany – sporttyq akrobatıkany damytýǵa barynsha úles qosyp, jasóspirimderge jattyqtyrýshy bolý», deıdi Botakóz Baıbaqusheva.

Ashat RAIQUL

Sońǵy jańalyqtar