10 Mamyr, 17:24 388 0 Óner Tańsulý ALDABERGENQYZY

Djekı Chan: QAZAQSTANNYŃ TABIǴATY UNAIDY

Kez kelgen kórermenniń, onyń ishinde jasóspirimderdiń Gollıvýd kıno juldyzdary jaıly aıtyla qalsa, eń birinshi Djekı Chan esine túseri haq. Ataqty ártis, kaskader, kınorejısser, prodıýser, senarıst ári ánshi bir suhbatynda: «Men, akter bolyp týǵan joqpyn. Bári de birtindep qalyptasty. Adamdarmen jaqsy qarym-qatynasta bolý – kez kelgen túıindi ońaı sheshetini sekildi, eshkimdi jatyrqamaıtyn osy ashyq minezim ónerime de kóp paıdasyn tıgizdi. Árıne, eńbeksiz, izdenissiz taǵy bolmaıtyny belgili. Ár bala sııaqty meniń de boıymda atys-shabys kınolentalarǵa degen qyzyǵýshylyq mahabbaty basym bolǵan tárizdi», – degeni bar.
Gonkong qalasynda kedeı otbasynda dúnıege kelgen tanymal akter ata-anasy taqyr kedeı bolǵandyqtan balalyq shaǵynda azapty qıyn kúnderdi basynan kóp keshirgen. Keıin ata-anasyna Avstralııadan jumys tabylyp qonys aýdarǵan kezde, alty jasar Djekı óz otanynda qalyp, Qytaı jabyq drama akademııasyna oqýǵa qabyldanǵany onyń baqytty bolashaǵyna bastaǵan tuńǵysh qadamy ispetti. Ol kezde akademııaǵa oqýshylardy qabyldaý óte qatań túrde, ol balanyń ata-anasynan bala dene jaraqatyn alyp nemese qaıtys bolyp ketken jaǵdaıda oqý orny jaýapkershilikke tartylmaıtyny jaıly qolhat alady eken. Osyndaı asa qatań tártiptiń tezine túsken bala- akter tańǵy saǵat beste turyp, saǵattap tynymsyz jattyǵýlarda shyńdalýdan ótedi. Shyńdalady. Shıryǵady. Akademııany bitirgen soń kınodaǵy jolyn kaskaderlikten bastaǵan qaısar Djekı Chan akterlik ómirinde de basyn talaı qaterge tigip, kezinde eki omyrtqasyn, murnyn, aıaq-qolyn talaı syndyrǵan. Keńirdegin jaralap, janarynan da aıyrylyp qala jazdaǵan akterdiń bas súıegin syndyryp, ólim aýzynan aman qalǵanyn bireý bilse, tipti bireý bilmes.
Kınematografııaǵa zor úles qosqany úshin qurmetti «Oskar» syılyǵyn alǵan akter bizdiń elimizge degen qyzyǵýshylyǵy da keremet ekenin sáýir aıynda ótken Elbasymen kezdesýinde taǵy da tilge tıek etti. Áńgime barysynda akterdiń álemdik kınematografııadaǵy mańyzdy róli erekshe atalyp, eki el arasyndaǵy shyǵarmashylyq jospar jáne kınoındýstrııa salasyndaǵy birlesken jobalardy júzege asyrý joldary jaıly oı bólisti.
– Qazaqstan tabıǵaty keremet memleket. Munda orman-toǵaı, taý, ózen-kól, ushy-qıyry joq sheksiz keń dala da bar. Meni qyzyqtyratyn da osyndaı kerim tabıǵat. Sondyqtan bıylǵy jyly túsirilmek fılmime osy bir peızajdardy tartsam degen josparym bar. Qazaqstanda fılm túsirýge, ásirese Sırııadaǵy qazaqstandyq balalardy qorǵaǵan «Jýsan» arnaıy operaııasynyń vıdeosyn kórip, tamashalaǵannan keıin sheshim qabyldadym. Gollıvýd, Qytaı kınojuldyzdary qatysatyn bul fılmniń keıbir kórinisteri Franııa men Izraılde túsirilmek. Kóz tartar peızajǵa baı Qazaqstannyń geografııasyna degen súıispenshilik aldyma osyndaı maqsat qoıýǵa jeteledi, sondyqtan da Qazaqstanǵa sapardy mamyr aıyna, al fılmniń tusaýyn qyrkúıek aıynda kessek degen oı bar,– deıdi Djekı Chan aǵynan jaryla.

 

Tańsulý ALDABERGENQYZY

Sońǵy jańalyqtar