10 Mamyr 2019, 17:16 618 0 Kólik "Túrkistan" gazetiniń avtorlary

Qoǵamdyq kólik 24:00-ge deıin júredi

Qasıetti ramazan aıynyń bastalýyna arnalǵan baspasóz máslıhaty ótti. Májiliske QMDB-nyń Almaty qalasy boıynsha ókili Erkinbek qarı Kerimbekuly, Ortalyq meshitiniń naıb- ımamdary Ersin Ámire, Ermek Kókirekbaev, meshit ustazy Talǵat Sapanov, sharıǵat máseleleri jónindegi keńesshi Baýyrjan Álıuly, «Iman» jýrnalynyń bas redaktory Ońǵar qajy Ómirbek qatysty.

Ókil ımam Erkinbek Kerimbekuly: «Aılardyń sultany Ramazan aıy – Allanyń adamzatqa tartý etken eń uly nyǵmetteriniń biri.
Bul aıda Haqtyń uly habary – Quran tústi. Bul aıda myń aıdan da qadirli – Qadir túni bar. Bul aıda Allanyń bes paryzynyń biri – Orazany shyn yqylaspen Alla rızalyǵy úshin tutamyz, aýyz bekitemiz.
Bul aı – tozaq esikteri jabylyp, jánnat esikteri aıqara ashyq turatyn aı.
Ramazan – saýaptar eselenetin, musylmannyń eń uly múmkindikterge qol jetkizetin aıy», – dep sóz bastap túsindirdi.
Ǵylymı zertteýler men sharıǵı mátinderdi, otandyq astronomııalyq kórsetkishti negizge alǵan QMDB-y ǵulamalar keńesi bylaı dep sheshken:
Ramazan aıynyń birinshi kúni – 6 mamyr. 31 mamyrdan 1 maýsymǵa qaraǵan tún – Qadir túni. 5 maýsym – Oraza aıt. Elimiz boıynsha pitir sadaqa – 300 teńge.
Almaty qalasyndaǵy 8 aýdanǵa qarasty barlyq meshitter aı boıy aýyzashar beredi.
Ortalyq meshit kúnine 500 adamǵa aýyzashar berýdi nıet etip otyr.
Almaty Ortalyq meshitinde kúndelikti (dúısenbi men senbi aralyǵynda) asyr men aqsham namazy arasynda dinı bilim jolyndaǵy jamaǵatqa arnaǵan «Rabbym, bilimimdi arttyr!» ıntellektýaldyq bilim saıysy ótedi. Aı sońynda jeńimpaz anyqtalyp, bas júlde – ýmra qajylyǵyna joldama alady.
Bostandyq aýdany meshitteri «Ramazanda ózińizge esep berip kórińiz» jarysyn uıymdastyrmaq.
Almaty qalasyndaǵy 50 meshitte taraýyq namazy oqylyp, 46 meshit taraýyq namazynda Quran Kárimdi tolyq hatym etpek.
Ramazan – qaıyrymdylyq aıy. Jyldaǵydaı bıyl da qala meshitteri áleýmettik az qamtylǵan otbasylarǵa qaıyrymdylyq aqııalaryn uıymdastyryp qarjylaı jáne azyq-túlik, kıim-keshekpen qamtamasyz qylmaq.
Qala keptelisi tyǵyz bolatyn Jandosov-Shaımerdenov, Rysqulov-Raıymbek kósheleriniń qıylysyndaǵy kepteliste turyp qalǵan avtokólikterge aýyzashar paketterin taratyp, qurma jáne sýmen aýyz ashtyrady. Taraýyq namazynyń kesh aıaqtalýyna baılanysty jamaǵattyń úılerine qaıtý máselesi de sheshimin taýyp, 4 baǵytta (Saın kóshesi, «Almaty-1» temirjol beketi, Talǵar trassasy jáne Dostyq dańǵyly baǵyttarynda) júretin avtobýstar kestesi 5 mamyr men 4 maýsym aralyǵynda ár keshte saǵat 24:00-ge deıin sozyldy.
«Sultan Qorǵan» meshitinde tegin taksı qyzmeti jolǵa qoıylmaq.
Almaty qalasy turǵyndaryna ramazan kestesi tegin taratylýda.
Ókil ımam Erkinbek qarı Kerimbekuly Ortalyq meshittiń tól jobasy «Qasıetti Quran Kárimniń artyqshylyǵyna qatysty 40 hadıs, «Tálimger Paıǵambar taǵylymy», «Islam ádebi» kitaptaryn, "Respýblıkalyq Quran jarysynyń foto tarıhy" albomyn tanystyrdy. Ramazan aıynda Almaty qalasy ákimdiginiń qoldaýymen árbir meshit pen jamaǵattyń qaýipsizdigi IIO qyzmetkerleriniń baqylaýynda bolady. Májiliste mamandar jýrnalısterdiń suraqtaryna jaýap berdi.

 

Kúlpara Jumaǵalı

Sońǵy jańalyqtar