10 Mamyr, 16:57 409 0 Qoǵam "Túrkistan" gazetiniń avtorlary

«Kópbalaly ana» jáne «kópbalaly otbasy» ekeýi bir nárse me?

Búgingi tańda memleketimizde «kópbalaly ana» jáne «kópbalaly otbasy» degen uǵym sınonım retinde jıi qoldanylyp júr. Alaıda, bul uǵym zańnamalyq qujatta eki túrli kórsetilgen. Qazaqstan Respýblıkasynyń 2005 jylǵy 28 maýsymynda qabyldanǵan «Balaly otbasylarǵa memlekettik járdemaqy týraly» №63 zańynda kópbalaly ana statýsy jaıynda aıtylǵan. Zańnyń 1-baby 1-tarmaǵynda kórsetilgendeı, «Altyn alqa», «Kúmis alqa» nemese «Batyr ana» I jáne II dárejeli «Ana dańqy» ordenderimen nagradtalǵan analar kópbalaly ana mártebesine ıe bolady.
«Altyn alqamen» jeti jáne odan da kóp balany ómirge alyp kelgen, ony tárbıelep ósirgen analar marapattalady. Sonymen qatar, osy ananyń jetinshi balasy bir jasqa jetkennen keıin jáne osy ananyń basqa balalarynyń barlyǵy ómirde bolǵan jaǵdaıda «Altyn alqa» beriledi. Al «Kúmis alqa» alty bala dúnıege alyp kelgen analarǵa taǵaıyndalady. Bul statýs ananyń altynshy balasy bir jasqa tolǵan jáne barlyq balalary ómirde bolǵan jaǵdaıda ǵana taǵaıyndalady. Kóp balaly ana ataǵyn alý úshin eń kemi «Kúmis alqa» ıegeri bolý kerek.
2014 jylǵy 8 naýryzda Elbasy N. Nazarbaev «Kóktem shýaǵy» atty jıynda «Qazir kópbalaly analar sany – jarty mıllıon, bul – naǵyz erlik» degen bolatyn. Al bıylǵy 8-naýryz – halyqaralyq áıelder kúnine arnalǵan elimizdiń basty sharasynda, kópbalaly analarǵa qoldaý kórsetýge arnalǵan jańa aýqymdy áleýmettik sharalardy júzege asyrýdyń mańyzdylyǵyn aıtyp, bul kómektiń kólemi birtindep arta beretinin atap ótti. Statıstıkaǵa súıensek, eń jas kópbalaly analar Shymkent qalasynda turady.
Al endi «Kópbalaly otbasy» degenimiz ne?» degen suraqqa jaýap bereıik. 2011 jylǵy 26 jeltoqsanda qabyldanǵan «Neke týraly (erli-zaıyptylyq) jáne otbasy týraly» kodeksiniń 1-baby, 17-2 tarmaqshasyna sáıkes, kópbalaly otbasy quramyna kámeletke tolmaǵan tórt jáne odan da kóp balasy bar otbasy kiredi. Ol balalar 1 jastan – bilim berý uıymdaryn bitiretin ýaqytqa deıin kópbalaly otbasynyń quramy bolyp sanalady. Sol sebepti eki uǵymdy shatastyrmaǵan jón.

Nargız Beken

Sońǵy jańalyqtar