8 Mamyr, 22:08 351 0 Aımaq Dınara MYŃJASARQYZY

 Bıyl Almatyda 1400 adam qonys toıyn toılamaq

Bıyl "Nurly jer" baǵdarlamasynyń Turǵyn úı qurylys jınaq banki baǵyty boıynsha 1 400 almatylyq turǵyn qonys toıyn atap ótpek, - dep habarlaıdy Tengrinews.kz tilshisi TÚQJB baspasóz qyzmetine silteme jasap.

Olardyń ishinde Almatylyq 472 otbasy óz páterlerine kirýge daıyndyq ústinde. Olardyń alǵan baspanalary Almaty qalasynyń Alataý aýdanyndaǵy "Saıaly" yqsham aýdanynda ornalasqan. Búgin jańa qonys ıelerin Qazaqstannyń Turǵyn úı qurylys jınaq banki ("Báıterek" holdınginiń enshiles uıymy) Basqarma tóraıymynyń orynbasary Janar Jubanııazova men Almaty qalasy ákiminiń orynbasary Muhıt Ázirbaev quttyqtap, olarǵa páter kiltin tabystady. "Búgin turǵyndarymyzben birge bárimiz qonys toıyn atap ótýdemiz. Olar turatyn Alataý aýdany - damyp kele jatqan jańa aýdandardyń biri. Munda mektepter, aýrýhanalar, bala baqshalar men sport keshenderi bar. Biz turǵyndarymyzdyń osy aýdanda jaıly ómir súrýi úshin, ony odan ári kórkeıtýge barynsha jaǵdaı jasaımyz", - dep atap ótti Muhıt Ázirbaev.  -Turǵyn úı qurylys jınaq banki salymshylarynyń qonys toıy taǵy bir qýanyshty jaıt, ıaǵnı tusaý keser sharasymen tuspa tus keldi. Bul dástúr "Saıaly" aýdanynyń kishkentaı turǵyny úshin ǵana emes, sondaı-aq, osy qýanyshqa jınalǵan barlyq qaýym úshin de asa mańyzdy. Osy jyly Almaty qalasynda dál osyndaı qonys toıyn Turǵyn úı qurylys jınaq bankiniń taǵy keminde 1 000 salymshysy atap ótpek. Buǵan qosa, Almaty qalasynda aldaǵy jyly shamamen 600-deı páter satylymǵa qoıylady. Ol úshin qala ákimdigi tarapynan 18 turǵyn úıdiń qurylysyn júrgizý josparlanǵan, - dedi Janar Jubanııazova.

Quttyqtaýlarmen qosa, bank jáne ákimdik qyzmetkerleri Saıaly yqsham aýdany turǵyndaryna óz úıleriniń aýlalaryn kórkeıtýge at salysty. Osylaısha, 50-den astam aq qaıyń kóshetteri jańa salynǵan úılerdiń kórkin keltirdi. Memlekettik baǵdarlama aıasynda Turǵyn úı qurylys jınaq bankiniń salymshylary alǵan úı 1 sharshy metri 159 000 teńgeden taza árleý kúıinde berildi. Atalǵan páterlerdi satyp alý úshin Turǵyn úı qurylys jınaq bankindegi shotta turǵyn úı baǵasynyń keminde 20 paıyzyn jınaý talap etildi. Bul "Nurly jer" baǵdarlamasy boıynsha qoıylǵan sharttardyń biri. Al, zaem boıynsha mólsherleme jyldyq 5 paıyzdy qurady. Máselen, 6,4 mıllıon teńgelik bir bólmeli páterdi satyp alý kezinde, banktegi depozıtte 1,3 mıllıon teńgeni jınaý talap etildi. Ol úshin Móldir Azanbekovanyń otbasyna eki jyl qajet boldy. Endi olar óz baspanasyna qol jetkizip, qonys toıyn atap ótti. "Buǵan deıin bizdiń óz úıimiz bolǵan joq. Biz jubaıymyz ekeýimiz ǵylymı qyzmetker retinde zertteý ortalyǵynda jumys istep júrip, qyzmettik páterde turdyq. Árıne, ol ózińe tıesili bolmaǵandyqtan, ózimizdi ol úıdiń tolyqtaı ıesi sııaqty sezine almadyq. Óz bapanań erteńgi kúnge degen senimdilikti arttyrady. Al osy páterdiń nesıesine ketetin qarajat otbasylyq bıýdjetimizge esh aýyrtpalyq túsirmeıdi. Aı saıynǵy nesıeni óteý somasy 45 000 teńgeni quraıdy", - dedi óz oıymen bólisken Turǵyn úı qurylys jınaq bankiniń salymshysy Móldir Azanbekova. Osy jyldyń alǵashqy 4 aıynda 12 656 qazaqstandyq otbasy óz qonys toılaryn atap ótti, olardyń 3 132-si – "Nurly jer" memlekettik baǵdarlamasy boıynsha baspana alǵandar. Jalpy, aımaqtardaǵy ákimdikterdiń málimetterine sáıkes, Qazaqstan boıynsha 14 220 páterdi qoldanysqa berý josparlanýda. Turǵyn úı nysandary jónindegi barlyq aqparat baspana.kz portalynda jarııalanǵan.

Sońǵy jańalyqtar