27 Sáýir 2019, 15:09 1045 0 Bilim "Túrkistan" gazetiniń avtorlary

"Arystan" lıeısteri Ant qabyldady

«Nursultan Nazarbaevtyń Bilim berý Qory» Qoǵamdyq qorynyń aıasynda 2011 jyly qurylǵan "Arystan" mamandandyrylǵan lıeıi lıeı kúnin atap ótti.

Munda Qazaqstannyń barlyq óńirinen kelgen 9-11 synypta oqıtyn 240 jasóspirim bilim alady. Aldyńǵy bitirýshi túlekter qazaqstandyq jáne sheteldik áskerı oqý oryndarynda bilimderin abyroımen jalǵastyrýda.

Mamandandyrylǵan «Arystan» lıeıindegi eń merekelik saltanatty kúnderdiń biri– Lıeı kúni, ol 2011 jyldyń 24 sáýirinen bastap úzdiksiz ótkizilip keledi.

Osy kúni «Nursultan Nazarbaevtiń Bilim berý Qory» Qoǵamdyq qorynyń dırektory, Dınara Nursultanqyzy Kýlıbaeva Lıeı bastyǵy pedagogıka ǵylymdarynyń doktory, zapastaǵy general-maıor Sábıt Sáýmenuly Taýlanovqa «Arystan» lıeıiniń Týyn tabystady, sol kúni lıeıdiń tuńǵysh túlekteri óz ómirlerindegi alǵashqy Antty qabyldaǵan bolatyn.

Bul osydan bastap Lıeıdiń qasıetti dástúrine aınaldy. Lıeı týynda beınelengen lıeı emblemasy men «MINDET, ABYROI, ERLIK» atty jazylǵan tý lıeısterdiń patrıottyq sezimin asqaqtata túsedi. «Lıeı! Tý astyna – Tik tur! Nazar solǵa!» -degen buıryqtyń berilýimen, sap túzegen lıeıstterdiń aldymen Lıeı týyn ustaýshylar saltanatpen júrip ótti.

Lıeı oqýshylary bul merekege saqadaı saı ázirlengeni kórinip tur. Áskerı merekelik kıimmen synyp boıynsha sap qurap turǵan lıeısterdiń júzinen áskerge tán jaýapkershilik, tabandylyq, batyldyq sezimi aıqyn kórinedi. Árbir berilgen buıryqqa saq qarap, shıraqtylyq tanytyp tur.

«...Semseri bol, Otannyń qynabynda, Sertke ustasa, selt etpeı jaltyldaǵan», – dep aqyn Muqaǵalıdyń óleńderinde aıtylǵandaı, sapta turǵan jas órenderdiń kózinen otty ushqyn jarqyldaıdy.

Jıyn Qazaqstan Respýblıkasynyń memlekettik Ánurany oryndalyp, lıeı basshysy pedagogıka ǵylymdarynyń doktory, zapastaǵy general-maıor Taýlanov Sábıt Sáýmenulynyń quttyqtaý sózimen ashyldy. Ary qaraı 9-synyp lıeıstteri saltanatty túrde ózderiniń Otanyna, Lıeıge degen adal qyzmet etý Antyn tapsyrdy.

Bul - lıeıster úshin ómirlik mańyzdy kún.Bıylǵy oqý jylyndaǵy «Lıeı kúninde» Almaty oblysy ákiminiń qarjylandyrýymen IT kabınetiniń ashylý saltanaty rásimi bolyp, ınformatıka pániniń muǵalimi Abısheva Madına Edilhanqyzynyń ashyq sabaǵy kórsetildi.

QR Tuńǵysh Prezıdenti N.Á.Nazarbaev 2013 jyly sáýir aıyndaǵy kelgen saparynda «Arystan» lıeıine joǵary baǵa berip, bul qaıyrymdylyq jobasy jeke kapıtaldyń jastarǵa memlekettik-jeke menshiktik mehanızm seriktestigi arqyly qoljetimdi, sapaly bilim berýdegi jarqyn kórinisi bolyp tabylatyn aıtyp ótti.

Lıeıdiń negizgi maqsaty – jasóspirimderdi joǵary deńgeıli bilimmen qamtamasyz etý, olardyń boıynda erlik, qajyr-qaırat, tózimdilik, joǵary mádenıet, azamattyq borysh pen jańa qazaqstandyq patrıotızmdi qalyptastyrý.

Lıeı túlekteri egemendi Qazaqstan Respýblıkasynyń Qorǵanys Kúshteriniń túrli qurylymdarynda qyzmetterin adal oryndaýǵa, quqyqtyq jáne azamattyq mindetterin abyroımen atqarýǵa tıis.Lıeıdiń oqý-materıaldyq bazasy kompıýtermen, ınterbelsendi taqtalarmen jabdyqtalǵan.

Lıeı kesheni zamanaýı synyptar men laboratorııalyq keshenderdi, muǵalimderge arnalǵan turǵyn úılerdi, lıeısterdiń jatyn ornyn, basseın, sporttyq jattyǵý keshenderin, lıngafondyq kabınetterdi, medıatekalardy, mýltımedıalyq sholý ortalyǵy jáne 20 myńnan astam ǵylymı jáne kórkem ádebıetterden turatyn kitap qory bar kitaphanany qamtıdy.

Aıgúl Mambetjanova

Sońǵy jańalyqtar