25 Sáýir 2019, 15:36 1060 0 Qoǵam Dınara MYŃJASARQYZY

Qazaqstan – Eýropa men Azııa arasyndaǵy negizgi tranzıttik el

Eýropa men Azııanyń arasyndaǵy negizgi tranzıttik el bolýǵa Qazaqstanda barlyq ınfraqurylymdyq jaǵdaı jasaldy. Bul týraly Beıjińde «Bir beldeý, bir jol» atty Beıjińdegi ekinshi forýmda QR Indýstrııa jáne ınfraqurylymdyq damý mınıstri Roman Sklıar aıtty, dep habarlaıdy QazAqparat mınıstrliktiń ókili Rýslan Imanqulovqa silteme jasap.

Mınıstrdiń aıtýyna qaraǵanda, Qazaqstan táýelsizdik alǵannan bastap halyqarlyq kóliktik jelilerge ıntegraııalaný maqsatynda kóp kúsh jumsaǵan. Atap aıtqanda, elimizde salalyq baǵdarlama ázirlenip, jańa áleýmettik -ekonomıkalyq sharttardyń talabyna saı keletin quqyqtyq negiz jasalǵan. Kóliktik qyzmet kórsetýde naqty orta qalyptasqan. «Sońǵy 10 jylda kóliktik salany damytýǵa shamamen 30 mıllıard dollar ınvestıııa salyndy. 2 myń shaqyrymnan astam temir jol salynyp, 6,3 myń shaqyrym avtokólik joly qalpyna keltirildi. Kaspıı teńizindegi porttyń qýattylyǵy 26 mln tonnaǵa deıin ulǵaıtyldy. 15 áýejaıdaǵy ushý-qoný jolaǵyna qaıta jóndeý jumystary júrgizildi», – deıdi ol. Roman Sklıar Qazaqstan men Qytaı elderiniń arasyndaǵy kóliktik-logıstıkalyq saladaǵy tyǵyz áriptestikti erekshe atap ótip, bul faktr eki el arasyndaǵy saýda-ekonomıkalyq yntymaqtastyqty nyǵaıta túsetinin jetkizdi. Mınıstrdiń aıtýynsha, qazirdiń ózinde  Qytaımen shekarada kedergisiz saýda jasaý úshin «Qorǵas – Shyǵys qaqpasy» arnaıy ekonomıkalyq aımaǵy (AEA) qurý jumysy tolyǵymen aıaqtalǵan. Onda 79 qatysýshy tirkelip, óndiris oshaqtary ornaǵan. AEA ınfraqurylymyna ındýstrııalyq jáne logıstıkalyq aýmaqtarmen birge, 2015 jyly iske qosylǵan Quryq porty kiredi. Teńiz júgin tasymaldaý boıynsha álemdik kóshbasshy, «COSCO Shipping» qytaılyq kompanııasy Quryq porttyń jumysyn damytýǵa belsendi qatysyp otyr. Sondaı-aq, halyqaralyq basqarýshy retinde retinde DP World (BAÁ) teńiz porttarynyń operatory jumysqa tartylǵan. 2014 jyly Lıanıýngan portynda qytaılyq seriktestermen birlese logıstıkalyq termınal qurylǵan. Ol búgingi tańda Qazaqstanǵa keletin jáne Qazaqstannan shyǵarylatyn júk tasymaldaryn biriktirýdiń basty baǵyty bolyp tabylady. Aıta ketsek, 25-27 sáýirde ótetin «Bir beldeý – bir jol» ekinshi forýmyna 40 eldiń Memleket basshylary men Úkimet basshylary qatysýda.

Sońǵy jańalyqtar