18 Sáýir 2019, 17:27 690 0 Ádebıet "Túrkistan" gazetiniń avtorlary

ARǴY BETTEN JETKEN ÁDEBIET

Belgili qalamger Jádı Shákenulynyń ádebı keshi aıasynda qazaq tarıhyndaǵy aqtańdaq oqıǵalardy zertteýge arnalǵan alty kitabynyń tusaýy kesildi.

Arǵy betten kelgen aǵaıynnyń arasynan ádebıet álemine ózindik qoltańba qaldyryp úlgergen jazýshynyń «Bozmunar» romany, «Altaı alyptary», «Ospan batyr jáne Shyǵys Túrkistan máseleleri» atty zertteý eńbekteri, «Qytaı qazaqtarynyń ádebıeti» atty ádebı syn-zertteýleri, «Begzat sóz» atty kitaptary oqyrmanǵa jol tartty. Sonymen birge oqyrmandar suranysy boıynsha «Qaraly kósh» kitaby Ahmet Baıtursynuly  úlgisindegi tóte jazýmen jaryq kórdi. Atalǵan shyǵarmalardyń tusaýkeserinde Temirhan Tebegenov,  Janat Ahmadı,  Ǵalym Jaılybaı syndy belgili tulǵalar pikir bildirip, baǵalaryn berdi.

Fılologııa ǵylymdarynyń doktory Temirhan Tebegenov: «Jyraqtan kelgen qandastardyń ishinde oqyrmanǵa kórkemdigi bıik týyndylarymen kelgen qalamgerler barshylyq. Solardyń qatarynda biz Jádı Shákenulyn aıtýǵa bolady. Onyń shyǵarmashylyǵyndaǵy basty másele – qazaq tarıhynyń beımálim tustaryn ashýy. Shyǵys Túrkistan, Shyńjań qazaqtarynyń tili óziniń baı-qunarlylyǵymenen, ádebı, sózdik qoryndaǵy tereń maǵynaly sózderdi saqtaýymen erekshelenedi. Jádı Shákenulynyń atalǵan romandarynda da, kórkem týyndylarynda da qazaq sóziniń qaımaǵy buzylmaǵan», – dedi.

Jánibek Áshim

Sońǵy jańalyqtar