18 Sáýir, 15:56 470 0 Qoǵam Dınara MYŃJASARQYZY

Túlkibasta qyzǵaldaq festıvali bastaldy

Qarataý men Alataýdyń túıisken tusynda ornalasqan Shubaıqyzyl shoqysynda jyldaǵy dástúrge saı «Aqsý-Jabaǵyly alaýy, Shubaıqyzyl-jalaýy!» aty qyzǵaldaqtar festıvali bastaldy.     

Túrkistan oblysy, Túlkibas aýdany, Shubaıqyzyl shoqysy elimizdiń «Qyzyl kitabyna» engizilgen Greıg qyzǵaldaǵy eń kóp ósetin aýmaq. Bul qyzǵaldaqtar Qazyǵurt, Tólebı, Báıdibek óńirlerindegi taýly aýmaqtarda kezdesedi. Jylyna bir ret nebári  10-15 kún ǵana gúldeıtin qyzǵaldaqtar tirshilik jańarǵan shaqta 15-20 gektardaı jerdi alyp jatqan alqap qyzyl kilemge oranǵandaı ásem túrge enedi.

2018 jyldan bastap tabıǵatymyzdyń kórkem syılarynyń biri qyzǵaldaqty dáriptep, keıingi urpaqqa bar mańyzdylyǵyn jetkizý maqsatynda «Aqsý-Jabaǵyly alaýy, Shubaıqyzyl-jalaýy!» atty qyzǵaldaqtar festıvalin ótkizý Túrkistan óńirinde dástúrge aınalǵan.

Aıtýly sharada alǵash bolyp sóz alǵan Túrkistan oblysy ákiminiń orynbasary Málik Otarbaev jıylǵan jurtty bıylǵy qyzǵaldaq festıvaliniń ashylýymen quttyqtady.

«Elbasymyz Nursultan Nazarbaev «Uly dalanyń jeti qyry» atty baǵdarlamalyq maqalasynda Qazaqstan alma men qyzǵaldaqtyń Otany ekenin aıtty. Tipti, qyzǵaldaq Qazaq dalasynan Eýropa elderine Uly Jibek joly arqyly jetti degen derek bar. Bul – biz úshin maqtanysh ári úlken jaýapkershilik. Búgingi is-sharanyń maqsaty - qorshaǵan ortany, sonyń ishinde qyzǵaldaqty qorǵaýǵa shaqyrý, «Rýhanı jańǵyrý» baǵdarlamasy aıasyndaǵy týǵan jerdi túletý, týrızm men tarıhı oryndardy nasıhattaý baǵytyndaǵy mindetterdi oryndaý. Endeshe sulýlyqtyń sımvolyndaı qyzǵaldaqtarymyz máńgi qulpyryp, Túrkistan oblysy gúldene bersin!», – dedi Málik Nurjanuly.

Al tanymal jazýshy «Alash» syılyǵynyń ıegeri Marhabat Baıǵut Shubaıqyzyl shoqysyn saqtap,  ony erekshe qorǵaýǵa alý kerektigin aıtty.  Jurtshylyqqa gúldi julmaý kerektigin eskertti.

 Dástúrli shara barysynda «Shubaıqyzyl – Qyzǵaldaqtyń Otany» teatrlandyrylǵan qoıylymy men «Shubaıqyzyl Qyzǵaldaǵym» sazdy-horeografııalyq kórinisteri qoıyldy.  

 Festıval aıasynda «Shuraılym, Shubaıqyzylym» atty jas qalamgerler men kompozıtorlardyń baıqaýy jańa formatta ótkizildi. Shara barysynda  atalmysh baıqaýlardyń jeńimpazdaryn marapattaý rásimi ótti.

Sondaı-aq, festıvalde «Uly dala urany – Qyzǵaldaq festıvali»  tabıǵatty qorǵaýshylar sherýi ótip, «Tabıǵat saqshylary» atty oblys aımaǵyndaǵy memlekettik qoryqtardyń kórmesi uıymdastyryldy. Sonymen qatar, jınalǵan jurt «Qyzǵaldaq saraıy» oblystyq sýretshiler kórmesin tamashalap, shara «Shubaıqyzyl» shoqysyna jalpyhalyqtyq saıahatqa ulasty.

Sońǵy jańalyqtar