17 Sáýir 2019, 23:19 860 0 Qoǵam Dınara MYŃJASARQYZY

Áshimbaev EQYU-nyń saılaý jónindegi keńesshilerimen kezdesti

Búgin Nur Otan partııasy Tóraǵasynyń Birinshi orynbasary Máýlen Áshimbaev Eýropadaǵy qaýipsizdik jáne yntymaqtastyq uıymy Demokratııalyq ınstıtýttar jáne adam quqyqtary jónindegi bıýrosynyń saılaý jónindegi keńesshileri Radıvoıa Grýıch jáne Vladımır Mısevpen, sondaı-aq, EQYU Parlamenttik assambleıasynyń ókili Dmıtrıı Todorıchpen kezdesti. 

Kezdesýde taraptar aldaǵy Qazaqstan Respýblıkasy Prezıdentiniń kezekten tys saılaýyna qatysty máselelerdi talqylady.

Sóz basynda Nur Otan partııasy Tóraǵasynyń Birinshi orynbasary Qazaqstannyń táýelsizdiktiń alǵashqy jyldarynan bastap EQYU-nyń halyqaralyq qaýipsizdikti saqtaý, beıbitshilikti qamtamasyz etý, adam quqyqtaryn qorǵaý jáne demokratııalyq tetikterdi ilgeriletýge baǵyttalǵan saıasatyn qoldap kele jatqanyn aıtty. Sondaı-aq ol qazirgi tańda Qazaqstan men EQYU arasyndaǵy qarym-qatynastyń kúsheıe túskenine nazar aýdardy.

«Qazaqstannyń EQYU-men yntymaqtastyǵy elimizdiń osy uıymǵa tóraǵalyq etken kezeńinde burynǵydan da nyǵaıa tústi. Sol kezde qabyldanǵan Astana deklaraııasy uıymnyń damýyna tyń serpin bergen mańyzdy qujat boldy», - dep atap ótti Máýlen Áshimbaev.

Sonymen qatar, ol EQYU-nyń barlyq standarttary Qazaqstannyń memlekettik baǵdarlamalary úshin negizgi baǵdar bolyp sanalatynyn tilge tıek etti. Onyń aıtýynsha, Qazaqstan úshin EQYU-men, Uıymnyń Demokratııalyq ınstıtýttar jáne adam quqyqtary jónindegi bıýrosymen jáne basqa da qurylymdarymen yntymaqtastyqty odan ári nyǵaıtý asa mańyzdy. Sondyqtan partııa Tóraǵasynyń Birinshi orynbasary aldaǵy ýaqytta ekijaqty qarym-qatynastyń damı túsetinine senim bildirdi.

Budan basqa Máýlen Áshimbaev dál qazir qazaqstandyqtardyń tarıhı kezeńdi bastan ótkerip jatqanyna nazar aýdaryp, Nursultan Ábishuly Nazarbaev Qazaqstan Prezıdenti retindegi ókilettigin toqtatqanymen, Nur Otan partııasynyń Tóraǵasy bolyp qala beretinin jetkizdi.

«Bizdiń partııa Elbasymyz aıqyndap bergen elimizdiń barlyq strategııalyq maqsattaryna qol jetkizý jolyndaǵy jumystaryn jalǵastyra beredi. Sondyqtan aldaǵy prezıdent saılaýyna belsendi túrde qatysamyz. Kelesi aptada ótetin partııanyń kezekten tys XIX sezinde saılaýǵa qatysatyn kandıdatymyzdy usynamyz. Nur Otan saılaýdyń ashyq ári ádil ótýine jáne barlyq demokratııalyq normalardyń saqtalýyna múddeli. Óıtkeni bul bılik sabaqtastyǵyn qamtamasyz etetin tetikterdiń biri bolyp sanalady», - dedi Máýlen Áshimbaev.

Sonymen birge, Nur Otan partııasy Tóraǵasynyń Birinshi orynbasary saılaýaldy úgit-nasıhat jumystary Qazaqstan Respýblıkasynyń Saılaý týraly zańyna jáne halyqaralyq talaptarǵa sáıkes júrgiziletinin aıtyp, partııanyń bul iste halyqaralyq baqylaýshylarmen birlesip jumys isteýge daıyn ekenin jetkizdi.

Óz kezeginde EQYU Demokratııalyq ınstıtýttar jáne adam quqyqtary jónindegi bıýrosynyń saılaý jónindegi keńesshisi Radıvoıa Grýıch elimizge Qazaqstannyń Syrtqy ister mınıstrliginiń usynysy boıynsha kelgenderin aıtty.

«Biz munda saılaýǵa qatysty keıbir talaptarǵa baǵalaý jumystaryn júrgizip, aldaǵy saıası naýqanǵa daıyndyqtyń qazirgi deńgeıin baǵamdaımyz. Sondaı-aq Uıymnyń atynan saılaýǵa baqylaýshylar jiberý isin pysyqtap, Qazaqstannyń birqatar memlekettik organdarymen, buqaralyq aqparat quraldarymen jáne saıası partııa ókilderimen kezdesýler ótkizemiz», - dedi Radıvoıa Grýıch.

Sondaı-aq, EQYU ókili aldaǵy ýaqytta Nur Otan partııasynyń jumysy qaı baǵytta órbıtinin surady. Bul saýalǵa jaýap bergen partııa Tóraǵasynyń Birinshi orynbasary eń aldymen Nur Otan Qazaqstannyń Tuńǵysh Prezıdentiniń saıasatyn ári qaraı jalǵastyryp, bılik sabaqtastyǵynyń beıbit jolmen júrgizilýine basymdyq beretinin aıtty.

«Elbasy saıasatynyń negizinde el damýynyń negizgi basymdyqtary anyq kórsetilgen. Birinshi basymdyq – naryqtyq ekonomıkany damytý. Qazirdiń ózinde biz bul baǵytta kóptegen jetistikterge qol jetkizdik. Ekinshi basymdyq – áleýmettik saıasat. Tuńǵysh Prezıdentimiz únemi osy salaǵa aıryqsha mán berip, halyqtyń ál-aýqatyn arttyrýǵa arnalǵan elimizdiń áleýmettik doktrınasyn qalyptastyryp berdi. Úshinshi basymdyq – elimizde beıbitshilik pen kelisimdi qamtamasyz etý. Bul – kópultty jáne geosaıası jaǵdaıy kúrdeli Qazaqstan úshin asa mańyzdy sala. Kelesi basymdyq – elimizdiń kópvektorly syrtqy saıasatyn júıeli túrde júrgizý. Partııamyz Elbasy anyqtap bergen osyndaı basymdyqtardy ári qaraı jalǵastyryp, olardyń saqtalýy úshin jumys isteıdi», - dedi Máýlen Áshimbaev.

Sonymen qatar, ol Qazaqstannyń aldynda turǵan basty maqsat – áleniń eń damyǵan 30 eliniń qataryna qosylý ekenine nazar aýdaryp, bul partııa jumysynyń da negizgi basymdyǵy bolyp qala beretinin aıtty.

«Eń damyǵan eldermen birge Ekonomıkalyq yntymaqtastyq jáne damý uıymy elderiniń qataryna qosylý da elimizdiń negizgi maqsattarynyń biri. Osy baǵyttaǵy basymdyqtar partııanyń jańa baǵdarlamasynda anyq kórsetilgen. Atalǵan mindetter bizdiń saılaýaldy naýqan kezindegi jumysymyzda da basty nazarda bolady», - dedi Nur Otan partııasy Tóraǵasynyń Birinshi orynbasary.

Aıta keteıik, Eýropadaǵy qaýipsizdik jáne yntymaqtastyq uıymy saıası dıalogqa arnalǵan halyqaralyq uıym. Negizgi maqsaty – jetildirilgen basqarý men demokratııalyq úrdis negizindegi aımaqtyq tynyshtyq pen qaýipsizdikti qamtamasyz etý. Uıymnyń quramynda Az ulttardyń isi jónindegi 9 joǵarǵy komıssar, Demokratııalyq ınstıtýttar men adam quqyqtary jónindegi bıýro jáne Parlamenttik assambleıa bar. Qazaqstan bul uıymǵa 1992 jyly múshe boldy. Al 2010 jyly elimiz Uıymǵa tóraǵalyq etip, álemdik deńgeıdegi ózekti máselelerdiń oń sheshilýine óz yqpalyn tıgizdi.

Sońǵy jańalyqtar