15 Sáýir, 18:24 273 0 Aımaq TURKYSTAN.KZ

Qarjy qyzmetkerleri 500 túp tal kóshetin otyrǵyzdy

Búgin ForteBank qyzmetkerleri men olardyń otbasylary Pavlodar qalasynyń Ýsolka shaǵyn aýdanynda jas aǵashtar otyrǵyza bastady.

Bul saýapty is oblysta 13 sáýirde bastalǵan aýmaqty kógaldandyrý, eldi-mekenderdi sanıtarlyq tazalaý jáne abattandyrý aılyǵy sheńberinde uıymdastyrylýda.

"Pavlodar – ForteBank úshin mańyzdy aımaq. Biz konomıkany jáne halyqty belsendi túrde nesıelendiremiz, jergilikti bıznesti damytýǵa barynsha kómektesemiz. Sonymen qatar bank úshin jeke kásipkerlikti áleýmettik jaǵynan qamsyzdandyrý men qala ómirine janashyrlyqpen aralasý zor mártebe. Sondyqtan da biz qala aýmaǵyna 500 túp aǵash kóshetin otyrǵyzý jáne oblys ákimdiginiń bastamasyn joǵary deńgeıde qoldaý týraly sheshim qabyldadyq", – dep atap ótti ForteBank Basqarmasynyń tóraǵasy Gýram Andronıkashvılı.

Aǵash otyrǵyzýǵa ForteBank-tiń 60 qyzmetkeri jáne olardyń otbasy músheleri qatysty. Qarjy salasynyń qyzmetkerleri Ýsolka shaǵyn aýdanyndaǵy aýmaqty qoqystan tazartyp, tal kóshetterin ekti. Onyń tehnologııasyn saqtaýǵa bank basshylyǵy tartqan kógaldandyrý boıynsha merdiger kompanııalardyń bilikti mamandary kómektesti.

Otyrǵyzylatyn 500 túp aǵashtyń ishinde 60 túp kógildir shyrsha, 260 túp jasyl shyrsha, 60 terek, 60 qaıyń jáne 60 túp shaǵan taly bar. Al kógaldandyrýǵa bólingen aýmaqqa onyń 247-in ǵana ornalastyrýǵa múmkindik týdy. ForteBank qyzmetkerleri qalǵan kóshetterdi "Densaýlyq" skverindegi fılıal ǵımaratynyń qurylysy aýmaǵyna egedi, onyń jerden 52 eski aǵash joıylady.

Daıyndaǵan: Ashat Raıqul

Sońǵy jańalyqtar