11 Sáýir 2019, 13:58 559 0 Nur Otan TURKYSTAN.KZ

HALYQTYŃ MÁSELESIN ShEShÝ – BASTY MINDET

Nur Otan partııasy:

Halyqtyń máselesin sheshý – basty mindetimiz

Búginde elimizde Elbasynyń Nur Otan partııasynyń kezekti XVIII sezinde bergen tapsyrmasyna sáıkes halyqtyń ál-aýqatyn arttyrýǵa baǵyttalǵan basymdyqtar júzege asyrylýda. Olardyń qatarynda azamattardyń ózekti áleýmettik máselelerin oń sheshýdi kózdegen «Halyqqa kómek» jobasy da bar. Osyǵan oraı partııa Tóraǵasynyń birinshi orynbasary Máýlen Áshimbaev Aqmola oblysyna arnaıy kelip, partııa Tóraǵasy anyqtap bergen jańa jobalardyń iske asyrylý barysymen tanysty

Atalǵan joba aıasynda elimiz boıynsha 2400-den astam ótinish túsip, onyń 40 paıyzy oń sheshimin tapty. Qalǵan aryz-tilekter boıynsha tıisti jumystar júrgizilýde. Al Aqmola oblystyq fılıalynyń qoǵamdyq qabyldaý bólmesinde ashylǵan Biryńǵaı áleýmettik terezege bir aıdyń ishinde kóp balaly otbasylardan 431 ótinish kelip túsip, onyń jartysyna jýyǵy (43 paıyzy) dereý sheshimin tapqan.

Sondaı sheshimderdiń biri Máýlen Áshimbaev pen oblys ákimi Ermek Marjyqpaevtyń qatysýymen oryn aldy. Naqty aıtqanda, qyzynyń oqý aqysy úshin kómek suraı kelgen kópbalaly ana Úmitjan Qobylovaǵa qajetti somada qarjylaı qoldaý kórsetildi. Sondaı-aq, onyń páter jaldap turatyny eskerilip, baspana máselesi de qaralyp, oblys basshylyǵy tarapynan zań sheńberinde tıisti jumystar júrgiziletin boldy.

«Halyqqa kómek» tikeleı Elbasynyń tapsyrmasymen qolǵa alynǵan joba. Sondyqtan azamattardyń ótinishterin aıaqsyz qaldyrmaı, belsendi jumys isteýimiz kerek. Óıtkeni halyqty alańdatqan máselelerdi oń sheship, dereý qyzmet kórsetý – bizdiń basty mindetimiz», – dedi M. Áshimbaev.

Taldaý nátıjesi kórsetkendeı, búginde atalǵan oblystaǵy kópbalaly otbasylardy eń aldymen baspana máselesi alańdatyp otyr. Sondaı-aq memleket tarapynan beriletin materıaldyq, ataýly áleýmettik kómekterdi rásimdeý, balalardy balabaqshalarǵa ornalastyrý, jumyspen qamtý, jumys berýshiden eńbekaqysyn ýaqytyly ala almaý sııaqty máseleler de tirkelgen. Partııa oblystyq fılıaly basshysynyń aıtýynsha, Biryńǵaı áleýmettik tereze arqyly kelip túsken ótinishterdiń eshqaısysy qaraýsyz qalmaı, olar boıynsha tıisti jumystar qolǵa alynady.

Partııa Tóraǵasy anyqtap bergen mańyzdy basymdyqtardyń taǵy biri – «Baqytty otbasy» jobasy. Bul bastama tikeleı kópbalaly jáne áleýmettik az qamtylǵan otbasylarǵa júıeli qoldaý kórsetýge baǵyttalǵan. Osy joba aıasynda partııa Tóraǵasynyń birinshi orynbasary Kókshetaý qalasyndaǵy Qaqjanovtar otbasyna arnaıy at basyn burdy. Bul otbasy tórt bala tárbıelep otyr. Ókinishke qaraı olardyń ekeýi sal aýrýyna (DP) shaldyqqan. Buǵan deıin bul otbasy eki bólmeli páterleriniń qalǵan somasyn ótep, tolyǵymen satyp alý úshin partııadan qoldaý suraǵan bolatyn. «Bul bastama da Elbasynyń tikeleı baqylaýynda. Óıtkeni kópbalaly otbasylarǵa júıeli qoldaý kórsetý memleketimizdiń negizgi basymdyǵy bolyp tabylady», – dedi M. Áshimbaev.

Sonymen qatar Aqmola oblysyna sapary barysynda Nur Otan partııasy Tóraǵasynyń Birinshi orynbasary Kókshetaý qalasyndaǵy sý basqan «Prıvokzalnyı» shaǵyn aýdanynyń turǵyndarymen kezdesti. Atalǵan máselege baılanysty Máýlen Saǵathanuly partııanyń jergilikti fılıalyna tótenshe jaǵdaımen kúres jumystaryn baqylaýda ustap, zardap shekken ár azamattyń memleket tarapynan beriletin mindetti kómekti alýyn qamtamasyz etýdi tapsyrdy. «Elbasy, partııa Tóraǵasynyń aldymyzǵa qoıyp otyrǵan eń basty mindetteriniń biri halyqty alańdatqan kez kelgen máseleni oń sheshýge yqpal etý. Sondyqtan sý tasqyny sııaqty aıtyp kelmeıtin apattardan zardap shekken azamattarǵa qoldaý kórsetý partııa jumysyndaǵy basymdyqtardyń biri bolyp sanalady. Mundaı máseleni qaıta boldyrmaý úshin aldyn alý jumystaryn kúsheıtip, basty sebebimen kúresýimiz kerek. Sondyqtan partııa oblys basshylyǵynyń osy baǵyttaǵy jumystaryn tikeleı óz baqylaýynda ustaıdy», – dedi Máýlen Áshimbaev.

Aıta keteıik, 2 sáýir kúni Aqmola oblysynda Qypshaqty ózeniniń sý deńgeıi kóterilip, tótenshe jaǵdaı saldarynan Kókshetaý qalasyndaǵy bes turǵyn úı men 15 aýla sý astynda qaldy. Óńir basshylyǵynyń málimetine súıensek, qazirgi tańda oblys ortalyǵynda tasqyn sý máselesi bir qalypty. Tótenshe jaǵdaımen kúresý úshin arnaıy tehnıkalar men jeke quramnyń 80 adamy jumyldyrylyp, apattyń saldaryn joıý jumystary qarqyndy túrde júrgizilýde.

Sondaı-aq, Máýlen Áshimbaev partııanyń aımaqtyq aktıvimen kezdesti. Jergilikti nurotandyqtar aldynda sóılegen sózinde ol Elbasy saıasatyn odan ári jalǵastyryp, Tuńǵysh Prezıdent jolynyń saqtalýyna basty kepil bolý partııanyń negizgi mindeti ekenin aıtty. Odan bólek, partııanyń jańadan qabyldanǵan «Baqýatty qoǵam: onjyldyqtyń 10 maqsaty» atty baǵdarlamasyn júzege asyrý barysyna nazar aýdardy

Sońǵy jańalyqtar