27 Naýryz 2019, 10:56 902 0 Qoǵam Nazym Toılybaeva

Qazaqstanda oralmandardyń mártebesi uzartyldy

QR Eńbek jáne halyqty áleýmettik qorǵaý mınıstrligi Qazaqstanda azamattyq almaǵan oralmandarǵa mártebesin uzartýǵa qatysty túsinikteme berdi, dep habarlaıdy QazAqparat.

«Táýelsizdik alǵan sátten bastap Qazaqstan etnıkalyq qazaqtardyń elge erikti túrde oralýyn yntalandyrý saıasatyn júrgizedi. 1991 jyldan bastap 303 myń otbasy nemese 1 mln 40 myń etnıkalyq qazaq tarıhı otanyna qonystandy jáne oralman mártebesin aldy. Bul kórsetkish el halqynyń 6 paıyzyn quraıdy. Osynyń arqasynda kóshi-qonnyń teris saldosynyń deńgeıin tómendetip, demografııalyq ósimge qol jetkizildi. Olardyń kópshiligi azamattyqty alyp, basqa qazaqstandyqtarmen teńdeı elimizdiń áleýmettik-ekonomıkalyq damýyna qomaqty úles qosyp keledi. Qazaqstanda etnıkalyq repatrıanttardyń beıimdelýi men ıntegraııalaý kúshin barynsha qolaıly jaǵdaılar jasalǵan. Osylaısha, oralman mártebesin alǵandarǵa Qazaqstan Respýblıkasynyń azamattyǵyn jeńildetilgen tártippen alýǵa quqyǵy bar (qalǵan sheteldikter Qazaqstanda keminde 5 jyl turýy qajet)», - delingen mınıstrlik habarlamasynda.

Sonymen qatar, oralman mártebesi ony alǵan kúnnen bastap bir jyl ótken soń toqtatylady. Oralman mártebesin uzartý oralman mártebesi toqtatylǵan kúnnen bastap úsh aıdan aspaıtyn merzimge ótinish bergen kezde jeńildetilgen tártippen azamattyq alý maqsattary úshin ǵana kózdeledi.

«Búgingi tańda qarastyrylǵan ýaqyt ishinde jeńildetilgen tártippen qazaqstandyq azamattyǵyn almaǵan oralmandar qandaı jaǵdaıdyń týyndaýy sebepterine qaramastan, mundaı múmkindikten aıyrylady. QR Eńbek jáne halyqty áleýmettik qorǵaý mınıstrligine osy máseleni sheshýge kómek kórsetý boıynsha kóptegen ótinishter kelip túsýde. Osyǵan baılanysty, aǵymdaǵy jyldyń 16 naýryzynda Qazaqstan Respýblıkasynyń Prezıdenti - Elbasy Nursultan Nazarbaev azamattyqty jeńildetilgen tártippen alý úshin oralmandar mártebesin 2019 jyldyń 31 jeltoqsanyna deıin uzartý týraly sheshim qabyldady. Osylaısha, mártebesi aıaqtalǵan oralmandar ony uzartý úshin jergilikti atqarýshy organdarǵa jáne qazaqstandyq azamattyǵyn jeńildetilgen tártippen alý úshin ishki ister organdaryna júgine alady», - dep atap ótilgen vedomstvo málimetinde.

 

Sońǵy jańalyqtar