5 Naýryz 2019, 13:03 630 0 Qoǵam Dınara MYŃJASARQYZY

Almatyda kópbalaly analarǵa qaıyrymdylyq kórsetildi

Almatyda «Jaqsylyq jasaýdan jarysaıyq!» atty qaıyrymdylyq sharasy ótti. Kópbalaly otbasylarǵa jáne múmkindigi shekteýli ata-analar men balalarǵa qoldaý kórsetý maqsatynda uıymdastyrylǵan ıgilikti iske «Bıznes bastaý» kásipkerlik mektebi uıytqy boldy.

– Búginde quny qymbat kóligimen, kózdiń jaýyn alatyn kóılegimen, toı-tomalaqtaǵy mol dastarhanymen maqtanatyn, sol arqyly abyroı jınaıtyn jandardyń qarasy kóbeıdi. Ókinishke qaraı, qoǵamdyq qundylyqtar ózgerip, zaman almasty. Meniń oıymsha, jastar arasynda meıirbandyq, adamgershilik, jomarttyq syndy qasıetterdi kópke úlgi etý úshin is-sharalardy kóptep ótkizýimiz qajet. Memleket – ol bılik ǵana emes, ol árbir azamat dep oılaımyn. Qoǵamnyń áljýaz toptaryna kómek qolyn sozý – árbir otandasymyzdyń paryzy hám jaýapkershiligi. Halyqaralyq áıelder kúni qarsańynda qolǵa alynǵan marafon osy nıetpen uıymdastyryldy, – dep atap ótti «Bıznes bastaý» kásipkerlik mektebiniń basshysy Ahmetbek Nursıla.

Uıymdastyrýshylardyń aıtýynsha, qaıyrymdylyq sharasyna áleýmettik az qamtamasyz etilgen 700-den astam adam qatysty.  Marafon nátıjesinde jas kásipkerler tarapynan jalpy somasy 2 mln. teńgeden astam qarajat jınaldy. Sonyń ishinde 20 kópbalaly otbasyna qarjylaı jáne 40 januıaǵa materıaldyq turǵydan kómek kórsetildi. Sondaı-aq múmkindigi shekteýli sábılerdiń emine de qarjylaı kómek berildi. Sonymen qatar osyndaı kómekke muqtaj otbasylardyń arnaıy tizimi belgilenip, jas kásipkerler aldaǵy ýaqytta olarǵa da qolushyn sozbaq.

Aıta keteıik, qaıyrymdylyq marafonyn ótkizý aldaǵy ýaqytta da dástúrge aınalmaq. Igilikti iske muryndyq bolǵandar osylaı qoǵamnyń sanasyn ózgertýge múddeli.

Sońǵy jańalyqtar