4 Naýryz 2019, 12:36 1978 0 Bilim Nazym Toılybaeva

 «T2T Networking» jobasynyń maqsaty qandaı?

Qazaq ulttyq qyzdar pedagogıkalyq ýnıversıtetiniń jas ǵalymdarynyń bastamasymen qolǵa alynǵan «T2T Networking» jobasy Qyzylorda oblysyndaǵy mektepterge tanystyryldy. Bul týraly oqý ornynyń Baspasóz qyzmetiniń jetekshisi Jandar Asan habarlady.

Qyzdar ýnıversıtetiniń bazasynda qurylǵan Qazaqstannyń jas pedagog-ǵalymdary qaýymdastyǵynyń uıytqy bolýymen qolǵa alynǵan bastama orta bilim berý salasynda basshylyq qyzmet atqaratyn ýnıversıtet túlekteri men elimizdiń pedagogıkalyq joǵary oqý ornyndaǵy jas ǵalymdardyń ortaq dıalog alańyn quryp, aýyldyq mektepterdiń ǵylymı-pedagogıkalyq áleýetin kóterýdi maqsat tutady.

Buǵan deıin «T2T Networking» jobasy Almaty oblysynda uıymdastyrylǵan bolatyn. Jýyrda jas ǵalymdar Qyzylorda oblysyndaǵy birneshe mektepke arnaıy is-saparmen baryp, mektep muǵalimderi men oqýshylaryna jańartylǵan bilim berý baǵdarlamasyna arnalǵan keshendi respýblıkalyq semınar-trenıngter júrgizdi. Atap aıtqanda, shara barysynda hımııa ǵylymdarynyń PhD doktory Móldir Abdraımova mektep basshylary men oqýshylarǵa Qyzdar ýnıversıteti týraly tolyqqandy málimet berip, Qazaqstan jas pedagog-ǵalymdary qaýymdastyǵynyń jumys barysymen tanystyrdy. Al, fılologııa ǵylymdarynyń PhD doktory, Qazaq ádebıeti kafedrasynyń meńgerýshisi Nargıza Baltabaeva «UBT-nyń jańa formaty jáne mamandyqtar týraly tolyq málimet», «Jańasha oqytý – zaman talaby» taqyrybynda sheberlik synybyn, PhD doktory Shahıslam Laıshanov «Ǵaryshtyq túsirilimderdi paıdalaný arqyly ekologııalyq máselelerdi anyqtaý», psıholog Aısulý Áýbákir «Ózińe degen mahabbat – ómirge degen mahabbat» taqyrybynda trenıngter ótkizdi. Sondaı-aq qolóner sheberleri sándik-qoldanbaly óner, áshekeı  buıymdardy ázirleýge arnalǵan sheberlik synybyn júrgizdi. Jıynǵa Shıeli aýdanyndaǵy jas mamandar da qatysty.

– Jastar jyly men Qyzdar ýnıversıtetiniń 75 jyldyǵy aıasynda qolǵa alynǵan jobanyń kózdegen maqsaty mol. Bul bastama – oqý orny túlekteriniń básekege qabilettigin arttyryp, olardyń jumyspen qamtamasyz etýine yqpal jasaıdy. Sonymen qatar pedagogtardyń kásibı áleýetin jetildiredi jáne bilim berýde jańa tehnologııalardy qoldanýdy damytady. Bizdiń oqý orny stýdentteriniń basym bóligi aýyldyq mektepterdiń túlegi ekendigin eskeretin bolsaq, atalǵan bilim uıalary jańa bilim berý baǵdarlamalaryn tolyqqandy meńgerip, jete tanysqany óte mańyzdy, – deıdi joba avtorlary.

Jas izdenýshiler qyzylordalyq jas mamandardy Qazaqstannyń jas pedagog-ǵalymdary qaýymdastyǵymen birlese jumys isteýge shaqyrdy. Óz kezeginde Shıeli aýdandyq bilim bóliminiń basshysy Bolat Seıilhanov jas ǵalymdarǵa ıgilikti iske uıytqy bolyp otyrǵandary úshin alǵysyn bildirip, bul bastama aımaqtaǵy mektep muǵalimderiniń áleýetin kóterýge serpin beretindigin atap ótti.

Óńirge jasaǵan sapar aıasynda jas ǵalym-pedagogtar Qyzylorda qalasyndaǵy «Bolashaq» ýnıversıtetinde uıymdastyrylǵan «Zamanaýı ǵylymnyń bolashaǵy – jastardyń qolynda» taqyrybyndaǵy respýblıkalyq jıynǵa qatysty. Alqaly keńeske Muhtar Áýezov atyndaǵy Ońtústik Qazaqstan memlekettik ýnıversıtetiniń, «Bolashaq» ýnıversıtetiniń de jas izdenýshileri qatysyp, saladaǵy túıitkildi máselelerdi talqylady. Basqosý barysynda Qyzdar ýnıversıtetiniń PhD doktory Juldyz Bazaeva «Latyn grafıkasyna negizdelgen qazaq álipbıin úıretýdiń ınnovaııalyq ádisteri», aǵa oqytýshy Gúlmıra Mahanova «Qoldanbaly qolóner», ǵylym magıstri Qaıyrden Baetov «Matematıkany aǵylshyn tilinde oqytý», oqytýshy Shynar Asylbekova «Bilim berý júıesinde elektrondy resýrstardy paıdalanýdyń tıimdiligi» taqyrybynda sheberlik synybyn ótkizdi.

Jıyn sońynda Qazaqstannyń jas pedagog-ǵalymdary qaýymdastyǵy men «Bolashaq» ýnıversıteti ózara yntymaqtastyq týraly memorandýmǵa qol qoıdy. Qujatta birlesken bilim berý baǵdarlamalaryn, oqý-ádistemelik quraldaryn ázirleý, stýdentterdiń birlesken ǵylymı zertteýleri men jobalaryn júzege asyrý, pedagog qyzmetkerlerdiń biliktiligin arttyrýǵa yqpal etý syndy máseleler qarastyrylǵan.

–  Aldaǵy ýaqytta Qyzylorda oblysyndaǵy jetekshi joǵary oqý ornynyń biri – «Bolashaq» ýnıversıtetiniń bazasynda Qyzdar ýnıversıtetiniń Qazaq ádebıeti kafedrasynyń fılıaly ashylmaq. Bul qos bilim ordasy arasyndaǵy áriptestikti jańa deńgeıge kóterýge yqpal etedi, – deıdi qaýymdastyq tóraǵasy Móldir Abdraımova.

Joba uıymdastyrýshylarynyń aıtýynsha, aldaǵy ýaqytta bul shara elimizdiń ózge de óńirlerinde jalǵasyn tappaq.

Aıta keteıik, ótken jyldyń sáýir aıynda Qazaqstannyń jas pedagog-ǵalymdarynyń birinshi respýblıkalyq Sleti qarsańynda otandyq jas pedagog-ǵalymdardyń qaýymdastyǵy qurylǵan bolatyn. Quryltaıshysy Qyzdar ýnıversıteti bolyp tabylatyn uıymdy qurýdaǵy basty maqsat – memleket pen qoǵam damýyna belsendi qyzmet etetin, jańasha turǵyda oılaı alatyn jas pedagog-ǵalymdardy biriktirý, olardyń dıalog alańyn qurý. Sonymen qatar bilim men ǵylym salasyndaǵy ózekti máseleler boıynsha jas pedagogtardyń júıelengen pikirlerin múddeli taraptarǵa jetkizý, oqytý men tárbıeleýdiń tıimdi tehnologııalarymen almasý da qarastyrylǵan. Qaýymdastyqqa 35 jasqa deıingi joǵary bilim berý júıesinde qyzmet etetin, pedagogıka salasynda ǵylymı-zertteý tájirıbesi bar oqytýshylar múshe bola alady.

Sońǵy jańalyqtar