27 Aqpan 2019, 15:25 694 0 Qoǵam Nazym Toılybaeva

Jambyldyq zeınetker Lamborghini-ge uqsas kólik qurastyrdy

Jambyl oblysy Shý aýdanynyń 67 jastaǵy turǵyny Meıa Tafıkov ártúrli eski kólikterdiń bólshekterinen erekshe jańa kólik qurastyryp shyqty, dep habarlaıdy QazAqparat.

Ónertapqyshtyń ol týyndysynyń syrtqy pishini kádimgi Lamborghini kóligine uqsas. Gıbrıd kólik kópshiliktiń qyzyǵýshylyǵyn týǵyzyp otyr. Sheberdiń ózi bul kólikke «Fıdana» degen ataý bergen. Ony qurastyrýǵa toǵyz jyl ýaqytyn sarp etipti. Alaıda, júrýge jaraǵanymen, qujattary bolmaǵandyqtan aýlada shań basyp tur.

«Jastaıymnan radıotehnıka men elektronıkaǵa qyzyǵyp óstim. Zeınetke jaqyndaǵanda túrli kólik qurastyrýǵa qumarta bastadym. Kóliktiń syzbasynan bastap syrlaýyna deıin ózim jasap shyqtym. Qazir kólik salonyn sándeý jumystary ǵana qaldy. Jazda tehnıkany synap kórdim. Kóliktiń barlyq bólshegi qoldan jasalǵan. Elektronıkasy men motoryna deıin jańartylǵan. Onǵa jýyq kóliktiń bólshekteri ketti deýge bolady. Alǵashynda bul kólikti ushatyn etip jasaǵym kelgen. Ony jasaýǵa da bolatyn edi. Biraq oǵan kóp qarajat ketedi. Ári qujat jınaýǵa qınalamyn»,-deıdi Meıa Tafıkov.

Avtokólik sheberi 70-jyldary alǵash ret óz kóligine alystan basqaratyn pýlt oılap shyǵarǵan. Sondaı-aq, aýyl turǵyndaryna balamaly energııa alatyn generator ornatýmen aınalysqan. Jańa kóliginiń tehnıkalyq tólqujatyn túgendep alǵannan keıin Meıa sportqa arnalǵan júk kóligin jasaýǵa nıettenip otyr.

 

Sońǵy jańalyqtar