14 Aqpan 2019, 10:36 718 0 Nur Otan Ásel ÁNÝARBEK

Qarttarǵa qajetti ortalyq

«Nur Otan» partııasy «Ardagerlerdi ardaqtaıyq» jobasy aıasynda zeınet jasyndaǵy qarııalardyń ýaqytyn tıimdi ótkizýine jol ashty. Iaǵnı, elimizdiń birqatar óńirinde qarttarǵa arnalǵan «Belsendi ómir» ortalyǵy jumysyn bastady. Bul ortalyqta zeınet jasyndaǵy qarııalar shahmat oınap, kitap oqyp, dombyra tartyp, qolónermen shuǵyldanyp, tipti, fıtnes zalynda jattyǵýlar jasaı alady.

Osyndaı ortalyqtyń biri Taldyqorǵan qalasynda ashyldy. «Belsendi ómir» ortalyǵynyń ashylýyna «Nur Otan» partııasynyń oblystyq fılıaly men Qazaqstan halqy Assambleıasy túrtki bolǵan. Jańa ortalyqta mádenı-rýhanı klýbtar, til úıretý jáne kompıýterlik synyptar jumys isteıdi. Ardagerlerdi belsendi ómir súrýge baýlıtyn ortalyqta psıholog pen zańgerler de qyzmet kórsetip, keńes beredi.

Dál osyndaı ortalyq Qyzylorda oblysynda da ashyldy. Bul – partııanyń Qazaqstan halqy assambleıasymen birlesken is-sharalar josparyna sáıkes qolǵa alynyp otyrǵan ıgi sharalardyń biri. Ortalyqtyń negizgi maqsaty – qazynaly qarttarymyzdyń turmystyq jaǵdaıyn jaqsartýǵa, áleýmettik belsendiligin damytýǵa, bos ýaqyttaryn qyzyǵýshylyqtaryna qaraı tıimdi  ótkizýge, sondaı-aq olardy qoǵamdyq ómirge tartý jáne qosymsha jaǵdaılar jasaý.

Ardagerler qaýymyn quttyqtaǵan «Nur Otan» partııasy Qyzylorda oblystyq fılıaly tóraǵasynyń birinshi orynbasary Ibadýlla Quttyqojaev ortalyq jumysynyń qazirgi qoǵamda «belsendi qarttyqtyń modelin» qalyptastyrýdaǵy róline toqtalyp, ardagerlerdi qoldaýǵa baǵyttalǵan  jumystardy atap ótti.

Saltanatty sharaǵa óńirde jumys saparymen júrgen QR Parlamenti Májilisiniń depýtaty Ahmet Mýradov qatysyp, Memleket basshysynyń úlkendi qurmetteý, qoldaý kórsetý baǵytyndaǵy mindetterin tıimdi júzege asyrýda «Nur Otan» partııasy men Qazaqstan halqy assambleıasynyń ıgilikti bastamalaryna sáttilik tiledi. Ortalyqtyń ashylýyna oblystyń ardagerleri men zeınetkerleri, etnomádenı birlestik ókilderi, sondaı-aq, Qorqyt ata atyndaǵy QMÝ oqytýshylary men belsendi jastar qatysty.

Qaraǵandynyń Dostyq úıinde de zeınet jasyndaǵy azamattarǵa arnalǵan «Belsendi ómir» ortalyǵy jumysyn bastady. Onda qarttar kez kelgen ýaqytta bas qosyp, pikir bólise alady. Ortalyqta mádenı-rýhanı klýbtar, memlekettik, aǵylshyn tilin oqytý  sabaqtary jáne kompıýterlik synyptar  jumys isteıdi. Sondaı-aq, kitaphana, shahmat oıyny, demalys, densaýlyq zaldary bar. Qolónermen shuǵyldanam deýshilerge shyǵarmashylyqty damytý ortalyǵy aptanyń kez kelgen kúninde jumys isteıdi. Sol arqyly qalada turatyn zeınet jasyndaǵy azamattardyń ýaqytyn tıimdi ótkizýi úshin jaǵdaı jasaý kózdelgen. Tipti, psıholog pen zańger keńesiniń qyzmeti de usynylǵan.

 

Sońǵy jańalyqtar