11 Aqpan 2019, 17:32 2781 0 Qoǵam Nazym Toılybaeva

Qazaqstanda jasy 1-den asqan balalarǵa járdemaqy tólenýi múmkin

Qazaqstanda jasy 1-den asqan balalarǵa da járdemaqy tóleý múmkinshiligi qarastyrylyp jatyr. Bul týraly búgin Úkimet úıinde ótken baspasóz máslıhatynda QR Qarjy mınıstri Álıhan Smaıylov aıtty, dep habarlaıdy QazAqparat.

Onyń aıtýynsha, QR Úkimetiniń janynan qurylǵan azamattardyń tabysyn arttyrý, turmys sapasyn jaqsartý jáne kópbalaly otbasylarǵa qoldaý sharalaryn kúsheıtý jónindegi jumys toby bala kútimine baılanysty járdemaqy tóleý merzimin ulǵaıtý usynysyn qarastyrýda.

«Bul másele qazirgi ýaqytta jumys tobynda qarastyrylyp jatyr. Eń aldymen, bul, bala bir jasqa tolǵannan keıin de kómek kórsetý úshin jas shegin uzartýǵa, sonymen qatar járdemaqy kólemin arttyrýǵa qatysty. Mundaı usynystardy engizemiz. Muny júzege asyrýǵa bolady jáne bul baǵytta jumys istep jatyrmyz», - dedi mınıstr.

Osy oraıda ol  balalary bar otbasylarǵa beriletin jerdemaqynyń qoldanystaǵy júıesine sáıkes bala 1 jasqa tolǵanǵa deıin jórgekpul alatyndyǵyn aıtty. Jáne onyń kólemi otbasydaǵy bala sanyna baılanysty teńgerimdi ekendigin eske saldy.

«2018 jyly 395 myń adam balany dúnıege ákelgeni úshin 40,7 mlrd teńge járdemaqy aldy. Al balanyń bir jasqa deıingi kútimine baılanysty 125 myń adam 30 mlrd teńgege jýyq járdemaqyǵa ıe boldy»,- dedi ol.

Mınıstrdiń dereginshe, múdegek bala tárbıelep otyrǵan 80,6 myń adamǵa 29,5 mlrd teńge járdemaqy berildi.  Munan bólek, «Altyn alqa» men «Kúmis alqa» ıegerlerine, kópbala analarǵa aı saıyn járdemaqy tólenedi. Ótken jyly mundaı 271 myń otbasyna 33 mlrd teńge bólingen.

«Sondaı-aq jumys isteıtin áıelderge júktiligine jáne bala týýyna baılanysty tabysynan aıyrylǵan jaǵdaıda áleýmettik tólem tólenedi. Bizde ony 188 myń adam aldy, tólemniń ortasha kólemi 391 myń teńgeni qurady. Bir jasqa deıingi bala kútimimen 429 adam aınalysyp, tólem somasy 96 mlrd teńgeni qurady. Bul Memlekettik áleýmettik saqtandyrý qorynan tólengen sońǵy tólemder. 2018 jyldyń qorytyndysynda MÁSQ-ten 165 mlrd teńge tólendi. Sonymen qatar qoldaýdyń salyqtyq jeńildikter sekildi basqa da túrleri bar»,-  dedi Á.Smaıylov.

Aıta keteıik, QR Qarjy mınıstri Álıhan Smaıylov Úkimet janynan qurylǵan jumys toby, sondaı-aq kópbalaly otbasylardy baspanamen qamtý máselesin de qarastyryp jatqanyn málim etti.

 

Sońǵy jańalyqtar