6 Aqpan 2019, 15:31 480 0 Kólik Nazym Toılybaeva

Fly Arystan bıletteri qashan satylymǵa shyǵady

QR Indýstrııa jáne ınfraqurylymdyq damý mınıstri Jeńis Qasymbek Qazaqstanda ashylatyn jańa loýkoster Fly Arystan jumysy jóninde pikir bildirdi, dep habarlaıdy QazAqparat.

"Bıyl mamyr aıynda Fly Arystan áýe kompanııasy óz jumysyn bastaıdy. Eki borty Qazaqstanda daıyn tur. Jyl sońyna deıin sý jańa tórt A320 ushaqtary alynady. Qazirgi ýaqytta áýe kompanııasynyń jumysy boıynsha zańnamaǵa sáıkes ózgertýler engizip jatyrmyz", - dedi Jeńis Qasymbek Úkimet úıinde "Otandyq óndiristi damytý jáne kólik-logıstıka salasyn jańǵyrtý" brıfınginde.

Onyń aıtýynsha, bılet quny Qazaqstanda Air Astana baǵasynan eki esege arzan bolady.

"Máselen, túrli baǵytqa Air Astana bıletteri shamamen 100 dollardy quraıdy. Bul baǵa satyp alý merzimine baılanysty ózgerip otyrady: bir apta turyn alsańyz - bir baǵa, úsh kún buryn alsańyz - basqa baǵa degendeı. Fly Arystan bıletteri Qazaqstan baǵyttary boıynsha shamamen 40-45 dollar bolady dep boljap otyrmyz. Demek, Qazaqstandaǵy Air Astana, BekAir, Scat kompanııalarynan anaǵurlym tómen", - dedi mınıstr.

Naýryz aıynyń basynan bastap, mamyr aıynda ushatyn Fly Arystan bıletterin satyp alýǵa bolady.

"Bizdiń mindetimiz - Qazaqstan azamattaryna ushaq bıletin qoljetimdi etý. Munda kórsetiletin qyzmet te ózgesheleý bolady. Ádettegideı tegin 20 keli emes, 5 keli júk orny beriledi. Odan artyq júk úshin qosymsha aqy tóleýge týra keledi. Jańa áýe jelisine bıýdjetten nemese Samuryq-Qazynadan qosymsha qarjy bólinbeıdi. Bul kompanııa Air Astana qarajaty esebinen jumys isteıdi", - dep túsindirdi J. Qasymbek.

 

Sońǵy jańalyqtar