5 Aqpan 2019, 10:54 715 0 Qoǵam Nazym Toılybaeva

Qalmuhanbet Qasymov 5 balanyń ómirin jalmaǵan órttiń shyǵý sebebin aıtty

Jyl berý maýsymy bastalǵannan beri órt azaıǵanymen, ýlanýdan qaza tapqan adamdar sany 12 paıyzǵa artyp otyr. Bul týraly búgin Úkimettiń selektorlyq rejimdegi otyrysynda QR Ishki ister mınıstri Qalmuhanbet Qasymov aıtty, dep habarlaıdy QazAqparat.

«11 aılyqtan 12 jasqa deıin 5 bala qaza tapty. Órttiń sebebine keler bolsaq, pesh jaqqanda qaýipsizdik sharasy saqtalmaǵan. Órt sodan shyǵyp otyr. Sodan keıin balalar túngi ýaqytta qaraýsyz qalǵan. Órt sóndirýshiler 7 mınýtta jetken. Polıııa men jedel járdem de osy ýaqytta bolǵan. Biraq, ókinishke oraı jaǵdaıdyń aldyn alýǵa múmkindik bolmady», - dedi Q.Qasymov.

Onyń aıtýynsha, elimizde qazirgi ýaqytta mundaı jaǵdaılar az emes. Degenmen, jylý berý maýsymy ótken jyldyń 15 qazanynda bastalǵan beri beri órt birshama azaıdy.

«Eń bastysy qaza tapqandardyń sany azaıdy. Biraq, ýlanýdan qaza bolǵandar sany 12 paıyzǵa artyp otyr. Jyl saıyn bizdiń órtke qarsy qyzmet aldyn alý sharalaryn júrgizedi. Sońǵy birneshe aıda 1,7 mln jeke úıdi aralady. 4 mln adammen kezdesip, túsindirý jumystaryn júrgizdi. Osy jaǵdaıǵa baılanysty taǵy jumysty jandandyramyz», - dedi mınıstr.

Búgingi Úkimettiń selektorlyq rejimdegi otyrysynda QR Premer-Mınıstri Baqytjan Saǵyntaev órtten qaza tapqan 5 balanyń ata-anasyna kóńil aıtty.

Eske sala keteıik, 4 aqpan kúni túnde elordanyń Saryarqa aýdanyndaǵy «Kóktal-1» turǵyn úı alabynda jeke úıdiń aýlasynda turǵyzylǵan ýaqytsha baspanada órt shyqty. Órtti sóndirý barysynda 2006, 2008, 2014, 2016, 2018 jylǵy 5 qyz balanyń denesi tabyldy.

Olardyń kishisi nebári úsh aılyq sábı edi. Órt kezinde bes balanyń ata-anasy túngi jumysta bolǵan.

Sońǵy jańalyqtar