31 Qańtar 2019, 12:56 1424 0 Sport Arman Qudaıbergen

SADRIDDIN AHMETOV KIM?

Apta basynan beri áleýmettik jeliler men buqaralyq aqparat quraldarynyń kóbi Monreal qalasynda ótken boks keshi jaıly sóz qozǵaýda.

Birinshi orta salmaq dárejesinde jastar arasynda WBC tujyrymy boıynsha álem chempıony ataǵyn enshilegen Sadrıddın Ahmetov Kanada tórinde kók týymyzdy jelbiretti. 22 jastaǵy qarsylasy meksıkalyq Abraham Hýaresten babynyń basymdyǵyn «áp» degennen baıqatqanmen, otandasymyz kezdesýdi 4 raýndqa deıin sozǵandaı boldy. Ahmetov osy kezdesýden keıin óz salmaǵy boıynsha BoxRec reıtınginde 116 saty joǵarylap, 1850 boksshynyń ishinen 85 orynǵa jaıǵasty. Ol osyǵan deıin 7 kezdesý ótkizip, onyń bárin ýaqytynan buryn aıaqtap, jeńiske jetken. Sońǵy kezdesýden keıin áleýmettik jelidegi keıbir pysyqaı «belsendiler» «onyń ulty ózbek» degen pikirdi taıqazanǵa saldy da jiberdi. Boksshynyń ózi bolsa: «Alda áli talaı úlken belester tur. Men ár jeńisimdi Qazaq elime arnaımyn, men Qazaq balasymyn», ‒ dep áleýmettik jelidegi paraqshasyna jazdy. 1998 jyly Túrkistan oblysy, Jetisaı qalasynda týǵan Sadrıddın Ahmetov búgin 21 jasqa toldy.

Sońǵy jańalyqtar