6 Jeltoqsan 2018, 15:28 1338 0 Qoǵam "Túrkistan" gazetiniń avtorlary

QALYQTAI BER, «AQ  KÓGERShIN» !

Astana qalasyndaǵy  «Jastar» mádenıet saraıynda búldirshinder arasynda «Aq kógershin» respýblıkalyq baıqaýy ótti. Oǵan Qazaqstannyń túkpir-túkpirinen ónerge beıimi bar balǵyndar qatysyp, olar Astananyń 20 jyldyǵyna oraı túrli  janr boıynsha  baq synady. Onyń ishinde toptyq bı, mánerlep taqpaq oqý, sán úlgisin kórsetý, jeke jáne qos daýysta án shyrqaý sekildi saıys túrleri bar.

Bul naǵyz óner meıramy boldy desek, artyq aıtqandyq emes. Kórermender «Osyndaı saıystardy jıi-jıi uıymdastyryp turǵan jón» degen usynys-pikir aıtyp jatty. Óıtkeni mundaı baıqaýlar balalardyń baǵyn ashyp, ónerin shyńdaı túsetini aıdan anyq.

Astana qalasyndaǵy «Ulaǵat» balalar baqshasynyń bıshiler toby osy konkýrsta Gran-prı jeńip aldy. Olardyń sol sáttegi qýanyshtan bal-bul janǵan jaıdary júzderi baqytty ekenderin tanytty, bári bir-birin japa-tarmaǵaı quttyqtaýmen boldy. Aralarynda «Ulaǵattyń» tárbıeshileri men ata-analar da bar.

– Meniń nemerelerim Nurálı men Málıkanyń «Ulaǵat» jekemenshik balalar baqshasyna baryp júrgenine úsh jyldaı bolyp qaldy. Osy ýaqyt ishinde tárbıelenýshilerdiń qandaı da bir baıqaýǵa qatysqanyn estigen joqpyn. «Nege?» dep surasam, jekemenshik balabaqshalarǵa ondaı usynys túse bermeıtin kórinedi. Myna baıqaýdy da uıymdastyryp otyrǵan «Aq kógershin» qoǵamdyq qory eken. Al memlekettik mekemeler osyndaı baıqaýlardy kóbirek uıymdastyrsa óte durys bolar edi. Sondaı-aq, balabaqsha memlekettik pe, álde jekemenshik pe, oǵan da qaramaý kerek. Barlyǵyna birdeı múmkindik bergen jón. Óıtkeni talapty da talantty baldyrǵandar barlyq balabaqshalarda bar, – deıdi baıqaýdy tamashalaýǵa kelgen Sara Nábıjanqyzy.

Shynynda da qulaqqa kiretin sóz. Sóz reti kelgende aıta keteıik, baıqaýdy uıymdastyrýshylar búginde tamasha ónerimen búkil álemdi tánti etken Dımash Qudaıbergenovtiń osydan on eki jyl buryn «Aq kógershin» saıysynda júldeger bolǵanyn aıtyp qaldy. «Aq kógershin» onyń án álemindegi dańǵyl jolyn ashqan. Olaı bolsa, osy baıqaýda baǵyn synaǵan búldirshinder arasynda Dımashtyń izbasarlary júrmegenine kim kepil?!. Sondyqtan «Aq kógershin» sekildi konkýrstardyń kóp bolǵany jaqsy.

Búldirshinder arasynda baıqaý ótkizýdiń ózindik qıyndyqtary bar shyǵar. Ony eshkim joqqa shyǵara qoımas. Degenmen de balǵyndardy úsh-tórt jasynan bastap túrli óner jolyna tárbıeleýmen ǵana shektelip qalmaı, olardyń taýdaı talaby men talantynyń jarqyraı kórinýine keń múmkindik beretin baıqaýlarǵa kóbirek qatysqandary quba-qup.

Taǵy bir aıtarymyz – osyndaı shyǵarmashylyq baıqaýlar men óner merekesi búldirshinderge kól-kósir qýanysh pen shattyq syılaıdy. Ony osy joly da baıqadyq. Balalar júzderi bal-bul jaınap, erekshe kóńil-kúıde júrdi. Al balalardyń qýanyshynan artyq baqyt joq.

Qalyqtaı ber, «Aq kógershin»! Ónerge beıimi bar baldyrǵandardyń baǵyn asha ber!

Asqar AǴABEKULY

Astana

Sońǵy jańalyqtar