6 Qyrkúıek 2018, 16:33 936 0 Jahan Nazym Toılybaeva

Aýǵanstandaǵy jarylysta Qazaqstanda oqyǵan jýrnalıst qaza tapty

Keshe Aýǵanstan astanasy Kabýl qalasynda bolǵan eki jarylys saldarynan Qazaqstanda oqyǵan jýrnalıst qaza tapty, dep habarlaıdy «QazAqparat» HAA tilshisi.

Eske sala keteıik, Kabýldyń batys bóliginde ornalasqan sport klýbtardyń birinde qos jarylys boldy. Birinshi jarylys sheıitter turatyn Dashtı Barchı kvartalynda jekpe-jek klýbynda bolǵan. Jarylǵysh qurylǵyny jankeshti-lańkes iske qosqan.

Ekinshi shabýyldy oqıǵa ornyna kelgen tilshiler tobynyń arasyna engen terrorıst jasaǵan. Iri lańkestik oqıǵasynyń saldarynan qaza tapqandardyń arasynda BAQ ókilderi de bar ekeni týraly aqparat tarady.

Búgin TOLO news telearnasy jarylys oqıǵasynyń egjeı-tegjeıin bilý úshin barǵan tilshisi Samım Faramarz men operatory Ramız Ahmadıdiń opat bolǵanyn málimdedi.

Tilshi Samım Faramarz jýrnalıst mamandyǵyna Ál-Farabı atyndaǵy Qazaq Ulttyq ýnıversıtetiniń jýrnalıstıka fakýltetinde oqyǵan. Osy ýnıversıtettiń «Baspasóz jáne elektrondy BAQ» kafedrasynyń meńgerýshisi, professor Gúlmıra Sultanbaevanyń málimdeýinshe, jýrnalıstıka fakýlteti Samım Faramarzdy eske alý maqsatynda shara ótkizbek.

Sońǵy jańalyqtar