16 Qarasha 2016, 20:05 2648 0 Qoǵam Dınara MYŃJASARQYZY

«Atameken» UKP jańa Salyq kodeksin ázirlemek

«Atameken» Ulttyq kásipkerler palatasy jańa Salyq kodeksi jobasyn ázirleý jáne ony keńinen talqylaý baǵytynda jumysyn bastady. Bul týraly Ortalyq kommýnıkaııalar qyzmetinde ótken baspasóz konferenııasynda UKP Basqarma tóraǵasy Abylaı Myrzahmetov málim etti.

«Qosymsha qun salyǵynyń shekti mólsherin tómendetý máselesi qoǵamda qyzý talqyǵa túskeni belgili. Aldaǵy ýaqytta shaǵyn jáne orta bızneske artylatyn qosymsha salyq júktemesiniń ósý qaýpi jóninde Qazaqstannyń tanymal ekonomıster toby ortaq pikirlerin de jarııalaǵan bolatyn. Salyq zańnamasynyń qıyndaı túsýi men ony oryndaýda bızneske salynatyn alymdardyń ósýi saldarynan eńbekaqy qorynda da júktemeniń artýyna qatysty týyndaıtyn suraqtar óz aldyna bólek másele», – dedi A. Myrzahmetov.

Basqarma tóraǵasy kásipkerlerdiń múddelerin eskere otyryp, jańa Salyq kodeksin ázirleý týraly bastama kóterilgenin jetkizdi.

«Ulttyq kásipkerler palatasy atalǵan suraqtyń kásipkerler úshin mańyzdylyǵyn eskere otyryp, ekonomısterdiń pikirine qoldaý tanytýda. Bıznestiń múddesin esepke ala otyryp, jańa Salyq kodeksin 2017 jyldyń 1 mamyryna deıin ázirleý týraly bastama kóterdi. Jańa salyq kodeksiniń basty maqsaty – shaǵyn jáne orta bızneske salynatyn salyq júktemesin azaıtý jáne salyqtyq ákimshilikti ońtaılandyrý. Bul iskerlik belsendilikti arttyrýǵa jáne bıznesti «kóleńkeden» shyǵarýǵa yntalandyrady», – dedi ol.

Sońǵy jańalyqtar