24 Qyrkúıek, 19:57 719 0 Jahan Anar LEPESOVA

Pýtın Nobel syılyǵyna usynyldy

Reseı prezıdenti Vladımır Pýtın 2021 jylǵy Beıbitshilik salasyndaǵy Nobel syılyǵyna usynyldy.  Osloda ornalasqan Nobel komıtetiniń keńsesine ótinimdi jazýshy Sergeı Komkov joldaǵan.

"Bul meniń Nobel syılyǵyna tórtinshi usynysym. Hat bıylǵy jyldyń 9 qyrkúıeginde jiberildi. Al 10 qyrkúıekte bul ótinim Oslodaǵy Nobel komıtetiniń shtab-páterine túsken", - dedi Komkov osy oqıǵaǵa oraı ótkizilgen baspasóz máslıhatynda.

Jazýshynyń sózinshe, marapattaýǵa ótinim joldaý qyrkúıekte bastalyp, qazanda aıaqtalady. Naýryz aıyna deıin komıtet olardy qarap, naýryz-sáýir aılarynda ótinim jibergenderge hattary qabyldanyp, qaralyp, tirkelgeni týraly habarlama jiberedi. Hattyń dittegen jerge jetýin muqııat qadaǵalaǵan Komkov Reseıden joldanǵan hat amerıkalyqtardyń tynyshyn ketirgenin aıtty.

«Jergilikti ýaqyt boıynsha 15:07-de hat Osloǵa jetkizilip, Nobel komıtetiniń hatshylarynyń biri qol qoıdy. Osy ótinimnen keıin AQSh tarapynyń tynyshy ketti. Keshke taman, jergilikti ýaqyt boıynsha saǵat 16-dan keıin Oslodaǵy AQSh ókili asyǵys ótinim toltyryp, Trampty Beıbitshilik salasyndaǵy Nobel syılyǵyna usyndy. AQSh prezıdenti BAÁ men Izraıl arasyndaǵy kıkiljińdi rettegen kórinedi», - dedi jazýshy.

Aıta keteıik, Beıbitshilik salasyndaǵy Nobel syılyǵy – bul 19 ǵasyrdyń aıaǵynda shved ónerkásipshisi jáne ónertapqyshy Alfred Nobel mura etip qaldyrǵan bes syılyqtyń biri. Ol adamǵa nemese uıymǵa beıbitshilikke qosqan erekshe úlesi úshin beriledi.

Eske sala ketsek, koronavırýs pandemııasyna baılanysty bıyl Nobel syılyǵyn tabystaý saltanaty onlaın-formatta ótedi.

Sońǵy jańalyqtar