24 Qyrkúıek, 18:19 386 0 Jańalyqtar Anar LEPESOVA

Tarazda «Qazaq halqyna myń alǵys» monýmenti ashyldy

Taraz qalasynda elimizdegi ózge ult ókilderiniń qazaq halqyna degen alǵysynyń sımvolıkalyq belgisi retinde «Qazaq halqyna myń alǵys» monýmenti boı kóterdi.

Jańa monýment «Arbat-1» jaıaý júrginshiler alleıasynda oryn tepken. Onyń qurylysyn «Temir-Baılyq» jaýapkershiligi shekteýli seriktestigi júrgizgen. Bıiktigi 30 metr nysannyń qurylysyna 158 mıllıon teńge qarjy jumsalǵan.

Nysanmen tanysqan Jambyl oblysynyń ákimi Berdibek Saparbaev monýment Elbasy Nursultan Nazarbaevtyń tapsyrmasy aıasynda boı kótergenin atap ótti.

«Qazaqstan halqy Assambleıasy eldegi ultaralyq qatynastardy nyǵaıtý jolynda aýqymdy jumystar atqarýda. Biz soǵys, asharshylyq, repressııa sekildi kóptegen qıyndyqtardy birge eńsergenbiz, ony búgingi urpaq jete bilip, túsinýi ári este saqtaǵany asa mańyzdy. Qazaqtar baýyrlas halyqtarǵa qıyn-qystaý kezeńderde qol ushyn sozyp, baýyryna basa bildi. Bul eskertkish olardyń qazaq halqyna shyn júrekten alǵys bildirýiniń belgisi. Eń bastysy – elimizde turatyn barlyq etnostardyń dostyǵy, beıbitshiligi men yntymaǵy. Elimizdiń Tuńǵysh Prezıdenti – Elbasy Nursultan Nazarbaev barlyq qazaqstandyqtar teń jaǵdaıda ómir súrýi kerek dep únemi aıtyp keledi. Sondyqtan ár etnostyń óz tilin, dástúrin, ádet-ǵurpyn jáne mádenıetin saqtap qalýy úshin kóp kúsh jumsaldy. Bizdiń táýelsizdik jyldaryndaǵy eń mańyzdy jetistigimiz – saqtalyp, nyǵaıyp kele jatqan ultaralyq dostyǵymyz», - dedi oblys ákimi.

Al «Dnepro» ýkraın etnomádenı birlestiginiń tóraǵasy Fedor Klımenko barsha etnostardyń atynan qazaq halqyna alǵysyn bildirdi. Sonymen qatar M.H.Dýlatı atyndaǵy Taraz óńirlik ýnıversıtetiniń «Qazaqstan halqy Assambleıasy» kafedrasynyń meńgerýshisi Parıda Imanjanqyzy sóz sóılep, monýmenttiń taǵylymy teńdesiz ekenin jetkizdi.

 

Sońǵy jańalyqtar