24 Qyrkúıek, 16:33 344 0 Praımerız Anar LEPESOVA

Praımerız: Debattar baıypty pikir alańyna aınaldy

«Nur Otan» partııasynyń jalpyrespýblıkalyq ishki saılaýynda daýys berýge sanaýly kún qaldy. Praımerız kandıdattary 14 qyrkúıekten beri jarııa pikirsaıysqa qatysyp, ózderiniń saılaýaldy baǵdarlamalaryn usynýda. Debattar ár óńirdiń túıtkildi máseleleri kóteriletin, olardyń sheshý joldary usynylatyn sal­maqty oı, baıypty pikir alańyna aınaldy.

Semeı qalasynda kúni búginge deıin pi­kirsaıys 8 ret uıym­das­tyrylyp, oǵan 40-tan astam úmitker qa­tysty. Seısenbide ótken  debatta úmit­kerler múmkindigi shekteýli aza­mat­tar­dyń qala aýmaǵynda qozǵalystaryn oń­­taılandyrý máselesin kóterdi. Son­daı-aq kandıdattar Semeı qalasyndaǵy qoǵamdyq kólikterdi jańartý, qala ishin abattandyrý syndy máselelerdi talqylap, ony sheshý joldaryn usyndy.

Al Aqmola oblysynyń Jarqaıyń aýdanynda ótken pikirsaıysta kan­dıdattardyń biri jas kásipkerlerdi qoldaýdy, jastarǵa úı salý máselesin kóterse, kelesi úmitkerler sybaılas jem­qorlyqpen kúres máselesin óziniń saılaýaldy baǵdarlamasynyń ózegi etken. Praımerızge qatysýshylar Memleket basshysy Qasym-Jomart Toqaevtyń  «halyq únine qulaq asatyn memleket» tujyrymdamasyn tilge tıek ete otyryp, azamattardyń barlyq syndarly óti­nish-tilekterin jedel ári tıimdi qa­ras­tyrý qajet ekenin jetkizdi.

Sondaı-aq jarqaıyńdyq kandıdattar patrıotızm men jastar máselesin de kóterdi. Úmitkerler el ishin aralap, turǵyndardan jınaǵan usynys, pikirlerdiń negizi de jastar máselesi bolyp otyrǵanyn aıtty. Barlyq usy­nystar aýdandyq partııa fılıalynyń saılaýaldy baǵdarlamasy men aýdannyń damý baǵdarlamasyna engizilmek. Sebebi el ahýaly halyq qalaýlylarynyń udaıy nazarynda bolýy qajet. Óńirdiń tynys-tirshiligine etene qanyqqanda ǵana máselelerdiń mánisimen jete ta­nysýǵa bolady deıdi praımerız qatysý­shylary.

Elordalyq kandıdattar da tartysty debat ótkizdi. Baıqońyr aý­da­nynyń qatysýshylary «Nóser ká­rizderi jáne tazartý qurylystary», «Qo­­ǵamdyq kólik», «Jastar», «Qaýipsiz­dik» sekildi 10 taqyryp aıasynda pikir ta­lastyrdy.

Úmitkerler atalǵan taqyryptar boıynsha tushymdy ıdeıalaryn usy­­nyp, qala ómirin jaqsartýǵa qa­ty­s­ty oılaryn ortaǵa saldy.

Máselen,  mem­­lekettik organdarda tálim­ger­lik ınstıtýtyn engizýdi, ıaǵnı tá­jirı­besi bar adamdardy jas qyzmet­ker­lerge tájirıbe berýge yntalandyrýdy usyn­dy. «Ádildik» BPU ókili jastar má­selelerin talqylaǵan pikirtalasta jas­tar úshin shekti jasty arttyrý qa­jettiligi týraly, mektepterde «Logıka» já­ne «Psıhologııalyq daıyndyq» pán­derin mindetti túrde engizý qajetin aıtty. Sonymen qatar ol memleketke EDB-dan halyqtyń kepilsiz nesıelerin sa­typ alý úshin baǵaly qaǵazdar shyǵarý­dy usyndy.

Al bıznes ókili  pikirtalas aldynda elordalyq avtobýs park­teri­niń júrgizý­shileri­men birneshe ret kez­desipti. Debatta ol eń aldymen, júr­gizý­shiler úshin yń­ǵaıly jaǵdaı ja­saý­dy, atap aıt­qan­da, sońǵy aıaldamalardy dáret­ha­na­lar­men jabdyqtaýdy usyn-dy.

Eske sala keteıik, Nur Otan par­tııasynyń partııaishilik saılaýynda onlaın daýys berý 1-3 qazan ara­ly­ǵynda ótedi.  Daýys berýge qatysý úshin «Praımerız» aqparattyq júıesine búgingi kúnge deıin 700 myńǵa jýyq partııa múshesi tirkeldi. Praımerızge 11 myńǵa jýyq úmitker qatysýda. Elimiz boıynsha orta eseppen bir orynǵa tórt adam úmitker bolyp otyr. Kandıdat­tar­dyń 70 paıyzy  ózin-ózi usynǵandar, al myń­ǵa jýyǵy – partııanyń jańa mú­she­le­ri. 37 paıyzy – áıelder, 29 paıyzy – 35 jasqa deıingi jastar.

Sońǵy jańalyqtar