23 Qyrkúıek, 17:15 535 0 Jahan Anar LEPESOVA

Lýkashenko Belarýs aýmaǵyna polshalyq taýarlardy kirgizýge tyıym saldy

Belarýstiń kedeni elge polshalyq taýarlardy kirgizýdi toqtaty. Bul týraly Gazeta Wyborcza habarlady.

Basylymnyń jazýynsha, shekaradan kofe qorabyn, shokolad kámpıtterdi, tipti dárethana qaǵazynyń bir býmasyn da alyp ótý múmkin emes. Kedenshiler týrısterge tańdaý quqyǵyn beredi: ne júk ishindegi polshalyq taýarlardy alyp tastaıdy, ne Polshaǵa keri qaıtady. Bir qyzyǵy, olar mundaı sheshim qandaı negizge súıenip qabyldanǵanyn túsindirmeıtin kórinedi.

Gazeta Wyborcza-nyń boljamynsha, bul tyıymnyń maqsaty – Mınsktiń sarqyla bastaǵan valıýtalyq qoryn qutqarý. Sondaı-aq, bul qadam arqyly Aleksandr Lýkashenko Polsha jáne Lıtvamen aradaǵy shekarany jabý týraly málimdemesiniń bos sóz emes ekenin kórsetpekshi. 17 qyrkúıekte Belarýs basshysy soǵys qaýpi týǵandyqtan eldiń jarty áskerine qarý ustatyp, eldiń batys shekarasyn jabýǵa májbúr bolǵanyn jáne «baýyrlas» Ýkraınamen aradaǵy shekarany kúsheıtilgen baqylaýǵa alýǵa týra kelgenin aıtqan edi.

9 tamyzda ótken prezıdent saılaýynan keıin Belarýste bastalǵan narazylyq sherýleri jetinshi aptaǵa ulasty. Saılaý qorytyndysyna, ıaǵnı Aleksandr Lýkashenkonyń 80 paıyzdan astam daýys jınaǵanyna senbeıtinderin aıtqan jurt onyń otstavkaǵa ketýin, elde qaıtadan saılaý ótkizilýin talap etýde.  Al Lýkashenko bul berekesizdiktiń artynda Belarýstiń túbine jetýdi kózdeıtin Batys elderi tur dep esepteıdi.

Eske sala keteıik, buǵan deıin Eýroparlament 5 qarashadan bastap Aleksandr Lýkashenko Belarýs prezıdenti retinde moıyndalmaıtynyn  málimdegen.

 

Sońǵy jańalyqtar