23 Qyrkúıek, 15:11 397 0 Kólik Anar LEPESOVA

Nur-Sultan – Máskeý baǵytynda áýe reısteri jandanady

«Air Astana» áýe kompanııasy Reseımen aradaǵy turaqty reısterdi qalpyna keltiredi.

Áýe kompanııasynyń Nur-Sultannan Máskeýge (Domodedovo) tikeleı reısteri 2020 jyldyń 26 qyrkúıeginen bastap aptasyna bir ret - sársenbi kúnderi (Boeing 767 laıneri) jasalady. Nur-Sultannan ushaq saǵat 21.40-ta ushyp shyǵyp, Máskeýge 22.15-te jetedi. Máskeýden ushaq 23.15-te ushyp, Nur-Sultanǵa saǵat 05: 35-te ushyp keledi.

«Ázirge bul reıske tek Qazaqstan men Reseı Federaııasynyń azamattary jáne QR-da turýǵa yqtııarhaty bar adamdar qabyldanady. Máskeýge baratyn qazaqstandyqtar saýalnamadan ótip, qolynda reısten ári ketkende 3 kún buryn jasalǵan koronavırýs juqtyrmaǵany týraly PTR-testiniń anyqtamasy bolýy kerek. Eńbek etý maqsatymen baratyn azamattar eki apta ishinde úıdegi karantınde otyrýy tıis», - dep habarlaıdy «Air Astana» áýe kompanııasynan.

Máskeýge baratyn Reseı azamattary bılet satyp alǵanymen, reıske tirkelýge deıin «Memlekettik qyzmetter» portalynda saýalnama toltyrýy kerek. Oǵan qosa 72 saǵat ishinde Reseı azamattary koronavırýs bar-joǵyn anyqtaıtyn PTR-testiden ótip, nátıjesin «Memlekettik qyzmetter» portalyna salyp qoıýy kerek.

Reseılik jolaýshylar Qazaqstanǵa kelgennen keıin 48 saǵat ishinde koronavırýs tekseretin testiden nemese 14 kúndik úıdegi karantınnen ótýi tıis. Eger Qazaqstanǵa kirgende osyndaı anyqtamany alǵanyna 5 kún ótpegen jaǵdaıda, ony Qazaqstanda qaıta aldyrýdyń qajeti joq. Úshinshi elderge Máskeý arqyly tranzıtke ýaqytsha tyıym salynǵan.

 

Sońǵy jańalyqtar