21 Qyrkúıek, 16:31 542 0 Aımaq Anar LEPESOVA

Elimizdiń 5 aımaǵynda qus tumaýy tirkeldi

Qazaqstannyń 5 oblysynda qus tumaýy tirkeldi. Bul týraly OKQ-da ótken baspasóz máslıhatynda QR Aýyl sharýashylyǵy vıe-mınıstri Gúlmıra Isaeva málimdedi.

«Búginge deıin 47 eldimekende (25 aýdan men 5 oblysta) qus tumaýynan qustardyń qyrylý faktisi tirkeldi. Jeke úılerde 12 926 úı qusy, sondaı-aq Soltústik Qazaqstandaǵy qus fabrıkalarynda 41 myń qus qyryldy. Aımaqtardy bólip qaraıtyn bolsaq, SQO-da 27 aýdanda (11 aýdanda) qustyń qyrylý faktisi tirkeldi. Onyń ishinde qus tumaýy 23 eldimekende (8 aýdanda) rastaldy. Tıisinshe 17 qyrkúıekten bastap Aýyl sharýashylyǵy mınıstrligi Soltústik Qazaqstandaǵy jeti aýdannan jáne Aıyrtaý aýyldyq okrýginen qus ónimderin shyǵarýǵa ýaqytsha tyıym saldy», - dedi Gúlmıra Isaeva.

Qus ónimderin syrtqa shyǵarýǵa tyıym salynǵan jeti aýdannyń qatarynda Tımırıazev, Jambyl, Qyzyljar, Taıynsha, Shal aqyn, Ǵ.Músirepov jáne M.Jumabaev aýdandary bar.

Vıe-mınıstrdiń aıtýynsha, 19-21 qyrkúıek aralyǵynda «Beskól» qus fabrıkasynda 41 myńǵa tarta qus qyrylǵan. Aqmola oblysynda 5 aýdannyń 9 aýylynda qustyń qyrylý faktisi tirkelipti. Jalpy 286 qus ólgen. Keseldiń odan ári taraýyna tosqaýyl qoıý úshin 19 qyrkúıekten bastap Aqmola oblysynyń Jarqaıyń aýyldyq okrýginen qus ónimderin syrtqa shyǵarýǵa ýaqytsha tyıym salyndy.

Sondaı-aq, Qostanaı oblysynyń 6 aýdanynda indet tarap,  505 qus qyrylǵany belgili boldy.

 

 

Sońǵy jańalyqtar