21 Qyrkúıek, 11:47 368 0 Jahan Anar LEPESOVA

Tórt qabyrǵaǵa qaıta qamalǵan ıspandar narazylyqqa shyqty

Madrıd turǵyndary narazylyq sherýine shyqty. Jergilikti turǵyndar qalada karantındik shekteýlerdiń qaıta engizilýine qarsy.

Esterińizde bolsa, buǵan deıin Madrıd bıligi qalanyń birneshe aýdanynda shekteý sharalaryn qatańdatqanyn habarlaǵanbyz.

Shekteý engizilgen aýdandardyń turǵyndary úılerinen tek jumysqa, mektepke nemese dárigerge qaralý úshin ǵana shyǵa alady. Saıabaqtar jabylyp, dúkender keshki saǵat 10-nan keıin jumys istemeıdi. Sondaı-aq, turǵyndarǵa 6 adamnan artyq jınalýǵa tyıym salyndy.

Narazylyq akııasyna shyqqan jergilikti turǵyndardyń sózinshe, karantın máseleni sheshpeıdi.

«Shekteýler negizinen turmysy ortasha aýdandarǵa engizilgen. Bul sharalar onsyz da ekonomıkalyq qıyndyqtardy bastan keship jatqan turǵyndardyń jaǵdaıyn odan saıyn qıyndata túsedi», - deıdi narazy top.

Aıta keteıik, pandemııa bastalǵaly Ispanııada 640 myńnan astam adam koronavırýs juqtyrǵan. Indetten 30,5 myńǵa jýyq naıqas kóz jumdy.

Al álemde indetke shaldyqqandar sany 31 mıllıonǵa jýyqtady. Qaterli vırýs 959 myńnan astam adamnyń ómirin jalmady.

Koronavırýs qurbandarynyń sany jóninen AQSh, Brazılııa men Úndistan alda tur. AQSh-ta 199 myńnan asa adam qaıtys bolsa, Brazılııada 137 myńǵa jýyq, al Úndistanda 87 myńǵa jýyq naıqas kóz jumdy.

Sońǵy jańalyqtar