19 Qyrkúıek, 09:08 547 0 Jańalyqtar Asyl TUMAR

Memleket basshysy BUU Bas Assambleıasynyń 75-sessııasyna qatysady

Qazaqstan Prezıdenti Qasym-Jomart Toqaev BUU Bas Assambleıasynyń 75-sessııasynyń jumysyna qatysady. Bul jaıynda Memleket basshysynyń baspasóz hatshysy Berik Ýálı Facebook paraqshasynda jazdy.

Mereıtoılyq sessııa «Biz qalaıtyn bolashaq, bizge qajet Birikken Ulttar Uıymy: mýltılateralızmge ujymdyq beıildiligimizdi naqtylaý» degen uranmen ótedi. Bas Assambleıanyń sessııasy áli jalǵasyp jatqan koronavırýs pandemııasy jaǵdaıynda ótetindikten, memleketter basshylarynyń sóıleıtin sózderi beıne baılanys formatynda bolady dep josparlanǵan.

Qazaqstan Prezıdenti 21 qyrkúıekte BUU 75 jyldyǵyna arnalǵan Joǵary deńgeıdegi kezdesýge, 23 qyrkúıekte BUU Bas Assambleıasynyń Jalpy debatyna qatysady. Qasym-Jomart Toqaev BUU Bas Assambleıasynyń 75 jyldyǵyna jáne Jalpy debattardaǵy kún tártibine baılanysty aǵylshyn tilinde eki beıneúndeý jasaıdy.

Qazaqstan Prezıdenti óz baıandamalarynda halyqaralyq ózekti máselelerdi sheshý isindegi álemdik qoǵamdastyqtyń is-qımyldaryn úılestirýdiń mańyzdylyǵyn, atap aıtqanda koronavırýs indetimen kúres, jahandyq ekonomıkalyq ósimdi qalpyna keltirý, terrorızmge qarsy is-qımyl, ıadrolyq qarýdy taratpaý jáne qarýsyzdaný, klımattyń ózgerýi sııaqty problemalardy kóteredi.

Memleket basshysy BUU-ǵa qatysty synı pikirlerdiń aıtylǵanyna qaramastan, ol álemdik saıasatta sheshýshi ról atqaratyn balamasy joq ámbebap uıym ekenine toqtalyp, 2030 jylǵa deıingi kún tártibindegi turaqty damý máselelerdiń júzege asyrylýy, halyqaralyq saıasattaǵy BUU-nyń rólin kúsheıtý, Ortalyq Azııadaǵy óńirlik yqpaldastyq salalary boıynsha júzege asyrylýy tıis máselelerdi qozǵap, birqatar halyqaralyq bastamalardy usynady.

 

Sońǵy jańalyqtar