17 Qyrkúıek, 11:54 410 0 Jahan Anar LEPESOVA

BUU bas hatshysy álem elderin vakına jaıly jalǵan aqparattarmen kúresýge shaqyrdy

BUU-nyń 75-sessııasy sheńberinde buqaralyq aqparat quraldarymen kezdesken uıymnyń bas hatshysy Antonıý Gýterrısh koronavırýstyń baqylaýdan shyǵyp bara jatqanyna alańdaýshylyq bildirdi, dep habarlaıdy RIA Novostı.

"COVID-19 pandemııasy – bul bizdiń ómirimizdegi eshbir daǵdarysqa uqsamaıtyn daǵdarys. Sondyqtan bas Assambleıanyń bıylǵy sessııasy da basqa sessııalarǵa uqsamaıtyn bolady", – dedi bas hatshy.

Gýterrısh adamzat balasy mundaı daǵdaryspen alǵash ret betpe-bet kelip otyrǵanyn tilge tıek etip, indetpen birlesip kúresýge shaqyrdy. Álemde koronavırýstan qaıtys bolǵandardyń sany 1 mıllıonǵa taqap qalǵanyn jáne derttiń emin izdestirýdi jalǵastyrý qajettigin jetkizdi. Dese de, vakına daıyn bolǵan kúnniń ózinde ol daǵdarysty retteı almaýy múmkin. Óıtkeni halyq arasynda vakınaǵa degen senimsizdik bar deıdi bas hatshy. Ol álem elderin ekpe týraly jalǵan aqparattyń taralýyn toqtatýǵa shaqyrdy.

"Vakınaǵa búkilálemdik ıgilik dep qaraý kerek. Óıtkeni COVID-19 epıdemııasynda shekara joq. Bárimiz úshin qoljetimdi vakına kerek", – dedi Gýterrısh.

Eske sala keteıik, DDSU taǵy bir qazaqstandyq vakınany tirkedi. Uıymnyń vakınalyq úmitkerler tizimine nanoemýlsıvti maıly adıývant negizindegi SARS-CoV-2 (COVID-19) ekpesin QR Aýyl sharýashylyǵy mınıstrligi QazUAÝ halyqaralyq vakınologııa ortalyǵy men QR Densaýlyq saqtaý mınıstrliginiń M.Aıqymbaev atyndaǵy ulttyq asa qaýipti ınfekııalar ǵylymı ortalyǵy birlese jasaǵan. Qazir ol klınıkaǵa deıingi zertteýden ótip jatyr.

Sońǵy jańalyqtar