6 Tamyz, 12:57 427 0 Nur Otan Anar LEPESOVA

«Nur Otan» jalǵyzbasty qarııaǵa qol ushyn sozdy

Galına Varfolomeeva 77 jasta, 2-shi toptaǵy múgedek. Almaty qalasynda 1961 jyldan beri turady. Qudaı qosqan qosaǵy 2000 jyly qaıtys bolǵannan beri jalǵyz turyp keledi. 30 shildede «Karavan» gazetinde zeınetker Galına Varfolomeevanyń qazirgi qıyn jaǵdaıy týraly aqparat shyqty. Bul jańalyqqa beı-jaı qaramaǵan «Nur Otan» partııasy músheleri birden ún qatty.

«Nur Otan» partııasynyń múshesi Asqar Bilisbekov Galına Alekseevnany turǵylyqty jeri boıynsha izdep baryp, jaǵdaıymen tanysty. Zeınetkerdiń №3 qalalyq emhanada onkologııalyq indetten emdelip jatqany, sondaı-aq jóndeý jumystaryn qajet etetin eski úıde turatyny anyqtaldy.

Partııa múshesi turǵyn úıdi jóndeýdi óz moınyna aldy: jyly eden tósep, sý qubyryn ótkizdi jáne úıdiń shatyryn aýystyrýǵa kómektesti. Sonymen qatar, kásipker óz qarajaty esebinen G.Varfolomeevaǵa 100 000 teńge tabystady.

«Biz birden qarııaǵa kelip, úı-jaıynyń jaǵdaıyn qarap shyqtyq. Birinshi bolyp sý qubyryn ótkizý máselesi turdy. Alaıda shatyrdyń da ábden tozyǵy jetkenin kórgende, biz «Exclusive Qurylys» seriktesterimen birge kómektesýge sheshim qabyldadyq. Jedel árekettiń arqasynda barlyq jumystar eki-úsh kúnde aıaqtaldy», – dedi Asqar Bilisbekov.

Budan bólek, «Nur Otan» partııasy Almaty qalalyq fılıalynyń Partııalyq baqylaý komıssııasynyń múshesi Baqytbek Jumabekov 6 túrli azyq-túligi bar sebetti tabystady.

«Men buǵan deıin eshkimnen kómek surap kórmeppin. Árqashan bárin ózim jasadym. Biraq kárilik degen osy eken, zeınetaqym da az. Kóp nársege qarajatyń jetispeıdi. Qıyn sátte tez jaýap berip, jyly úı týraly armanymdy oryndaǵandary úshin «Nur Otan» partııasy múshelerine úlken alǵysymdy bildiremin», – dedi Galına Varfolomeeva.

 

Sońǵy jańalyqtar