16 Shilde, 17:03 810 0 Jańalyqtar Asyl TUMAR

Pandemııa kezinde qazaqstandyqtardy elge tasyǵan ushqysh dúnıe saldy

36 jyldan astam ýaqyt áýe kemesin basqaryp, Air Astana kompanııasynda ushqysh bolyp qyzmet atqarǵan Qanat Sıdenǵalıev ómirden ótti, – dep jazdy QazAqparat.

«QR Indýstrııa jáne ınfraqurylymdyq damý mınıstrligi Azamattyq avıaııa komıteti Qanat Mútálipuly Sıdenǵalıevtiń dúnıeden ótýine baılanysty marqumnyń týǵan-týystary men jaqyndarynyń qaıǵysyna ortaqtasyp kóńil aıtady. Qanat Mútálipuly óz isiniń naǵyz mamany edi. 36 jyldan astam ýaqyt avıaııa salasynda qyzmet etip, túrli áýe kemeleriniń ushqyshy bolǵan», – delingen  komıtet habarlamasynda.

Air Astana kompanııasynyń atap ótýinshe, Qanat Sıdenǵalıev 2004 jyldyń mamyrynan beri áýe kemesiniń komandıri retinde Fokker-50 jáne Airbus320 ushaqtaryn basqarǵan.

«Ornyn eshkim basa almas kóshbasshy, uıymdastyrýshy jáne «Avıator» jazǵy kásipodaq tóraǵasy boldy. Barlyq ýaqytta da áriptesterine qol ushyn berip, olardy ómirlik qıyn sátterde qoldap otyrdy. Otbasylyq balalar úılerine kómek uıymdastyryp, oǵan belsendi qatysty. Áriptesteriniń balalary úshin únemi Jańa jyldyq mereke uıymdastyryp, ushqyshtarymyzdyń ál-aýqaty men jan-dúnıesi úshin únemi alańdap júretin. Kez kelgen jaǵdaıda oǵan arqa súıep, kómek beretindigine senimdi bolýshy edik. Qanat pandemııa jaǵdaıynda otandastarymyzdy elge alyp kelý boıynsha repatrıaııalyq reıster baǵdarlamasyna qatysty. Ómiriniń sońǵy sátine deıin kásipodaq jumysyna jáne áriptesteriniń moraldyq jaı-kúıine alańdaýshylyq tanytty», – dep eske alady áriptesteri.

Qanat Mútálipuly 1963 jyldyń 5 qańtarynda dúnıege kelgen. 1980 jyly Lomonosov atyndaǵy orta mektepti bitirgennen keıin Aqtóbedegi joǵary avıaııa ýchılıesine túsken. Eńbek jolyn Atyraý qalasynyń áýejaıynan bastaǵan.

Sońǵy jańalyqtar