15 Shilde, 15:53 548 0 Bilim Anar LEPESOVA

Aq úı shetel stýdentterin elden shyǵarý týraly sheshimin ózgertti

AQSh bıligi qashyqtan oqyp jatqan sheteldik stýdentterdi óz elderine qaıtarý týraly sheshiminen bas tartty.

«Amerıka daýysynyń» habarlaýynsha, birqatar shtat basshylyǵy jáne eldegi joǵary oqý oryndary bıliktiń sheshimine shaǵym túsirgen. Kópshiliktiń narazylyǵynan soń Aq úı óz sheshimin ózgertti.

Bıliktiń ústinen shaǵymdanǵandar qatarynda Garvard jáne Massachýsets tehnologııa ınstıtýty da bar. Sondaı-aq, shetel stýdentterin el aýmaǵynan shyǵarýǵa 20 shtat narazylyq bildirdi. Ondaǵan iri kompanııa, sonyń ishinde Google, Facebook jáne Twitter, kolledjder men ýnıversıtter sottarǵa AQSh prezıdentiniń talaby zańǵa qaıshy ekenin dáleldeıtin aıǵaqtar usynǵan.

Garvard ýnıversıtetiniń Aq úı ákimshiliginiń ústinen túsirgen shaǵymyn qaraǵan Massachýsets shtatynyń sýdıasy Ellıson Berroýz ereje zańǵa Aq úıdiń sheshimin zańǵa qaıshy dep tapty.

Jańa oqý maýsymynda Garvardtaǵy sabaqtardyń barlyǵy onlaın formatta ótpek. Prezıdent Donald Tramp kúzde barlyq mektepterdiń ashylýyn talap etip, Garvard ýnıversıtetiniń josparyn "orynsyz" dep ataǵan bolatyn.

Aıta keteıik, Djons Hopkıns ýnıversıtetiniń sońǵy deregi boıynsha AQSh-ta koronavırýs juqtyrǵandar sany 3,4 mıllıonnan asyp jyǵyldy. Elde indetten 136 myńnan asa naýqas kóz jumdy.

Mamandardyń boljamy boıynsha, aldaǵy 2-3 aptada Qurama shtattarda ólim-jitim kóbeıe túsýi múmkin. Eldiń densaýlyq saqtaý mınıstriniń kómekshisi Brett Jırýardyń aıtýynsha, kúzde indettiń ekinshi tolqynynyń bastalý yqtımaldyǵy joǵary. Óıtkeni vırýs turǵyndardyń 90 paıyzyn áli sharpyp úlgermegen.

Sońǵy jańalyqtar