14 Shilde, 16:40 606 0 Áleýmet Anar LEPESOVA

42 500 teńge: Ótinish berý úshin biryńǵaı jıyntyq tólemdi tóleý qajet pe?

 42 500 teńge áleýmettik tólemge ótinish berý úshin tabysynan aırylǵan azamattarǵa biryńǵaı jıyntyq tólemdi tóleýdiń qajeti joq. Bul týraly Eńbek jáne halyqty áleýmettik qorǵaý mınıstri Birjan Nurymbetov aıtty.

"Sáýirden bastap biraz mekeme, biraz sala jumysshylar úshin mindetti zeınetaqy jarnalaryn nemese áleýmettik jarnalardy tóleýden bosatyldy. Sondyqtan búgin atalǵan jarnalar arqyly qadaǵalaý múmkindigimiz shektelgen. Osyǵan baılanysty jaldamaly jumysshylarǵa qatysty osy joly zeınetaqy jarnamasy, áleýmettik jarnasy tólengeni týraly talap qoımaımyz. Ótken joly 12 aıda keminde bir tólem bolýy kerek degen talap bolǵan. Bul joly onyń esh máni joq", – dedi Nurymbetov onlaın brıfıngte.

Vedomstvo basshysynyń aıtýynsha, buǵan deıingi 42 500 teńge tóleý tájirıbesi boıynsha jaldamaly jumysshylar úshin ótinishti tek onyń jumys berýshisi ǵana bere alady.

«Jumys berýshi qyzmetkerin aqysyz demalysqa jibergenin rastap, óziniń jumysshylarynyń atynan tapsyrys beredi. Ol úshin aldaǵy 1-2 kúnde portalymyzda jumys berýshilerge qyzmetkerleriniń tizimin, oǵan qatysty málimetterdi engizýi úshin óte yńǵaıly servıs jasaımyz. Óz kezeginde jumysshylar jumys berýshisiniń ótinish bermegenin, ótinishiniń qanaǵattandyrylǵanyn anyqtaýǵa arnalǵan servıs qyzmetine júgine alady», - dep túsindirdi mınıstr.

Aıta keteıik, buǵan deıin Birjan Nurymbetov 42 500 teńge áleýmettik tólemdi taǵaıyndaý jumystary qashan bastalatynyn aıtqan bolatyn.

 

Sońǵy jańalyqtar